Astrit Patozi me anë të një statusi në “Facebook’, ka ironizur kryetarin e komisionit qendror të votimit në Partinë Demokratike, Jemin Gjana, i cili u shpreh sot se listat e anëtarësisë nuk mund të bëhen publike në faqen elektronike për shkak se shkelet ligji për mbrojtjen e të dhënave personale.
Patozi në statusin e tij, këtë herë ka postuar mesazhin e një miku të tij, i cili i shkruan se PD e ka një njeri që fiton gjithnjë brenda partisë, por jashtë saj jo.
Sipas tij, nuk preferon ta bëjë publik se kush është autori i batutës, pasi nuk i ka marrë leje.
POSTIMI I PATOZIT
Një miku im i paangazhuar në politikë më shkruante dje në WhatsApp:
”Partia Demokratike e ka gjetur njeriun që e fiton gjithmonë garën brenda partisë.
Tani i duhet të gjejë edhe një tjetër që të fitojë garën me partitë e tjera.”
Emrin e autorit nuk po e them sot për dy arsye.
E para, se nuk e kam marrë lejen e tij dhe nuk e di nëse kjo do t’i pëlqejë.
Por më kryesorja, se kam frikë që kjo mund të ndikojë për të prishur paanësinë deri tani perfekte të Komisionit të Jemin Gjanës
a.ç
