Instituti Ndërkombëtar Republikan (IRI) me bazë në Uashington sot ka publikuar rezultatet e një hulumtimi të kryer në mbarë vendin në prill të këtij viti.
Sipas tyre politika jostabile në Maqedoni është në rritje, kurse besimi në institucionet demokratike është në rënie, njofton TV21.
Sipas sondazhit, 20 për qind mendojnë se sot Maqedonia është më pak stabile sesa një vit më parë, ndërsa 12 për qind janë të bindur se Maqedonia po lëviz në drejtim të gabuar krahasuar me muajin janar të këtij viti.
Hulumtuesit e IRI-t thonë se pesimizmi rreth situatën politike duket të jetë shkaktuar nga sjellja e qeverisë në lidhje me skandalin e përgjimeve që u publikuan në vitin 2015.
64 për qind e të anketuarve shprehën mospajtim me vendimin e presidentit Gjorge Ivanov për falje të zyrtarëve të përfshirë në këto përgjime dhe 63 për qind mbështesin punën e Prokurorisë Speciale Publike që është duke i hetuar rastet e dala nga përgjimet. (b.an)
