Policia Metropolitane e Londrës po heton një sulm me zjarrvënie ndaj katër ambulancave të organizatës bamirëse hebraike Hatzola në zonën e Golders Green, në veri të Londrës, që po konsiderohet kryesisht si krim me motiv antisemitik, ndërsa hetuesit janë duke shqyrtuar edhe një lidhje të mundshme me një grup të lidhur me Iranin.
Ngjarja ndodhi në orët e para të mëngjesit të 23 marsit 2026, kur katër ambulancave iu vu qëllimisht zjarri, duke shkaktuar shpërthime nga cilindrat e oksigjenit, por pa lënë të lënduar, megjithëse pati dëme materiale dhe u evakuuan disa banorë të zonës.
Policia publikoi pamje të tre personave me kapuçë, që hodhën lëndë djegëse mbi automjete dhe më pas u larguan, ndërsa hetuesit kanë marrë në shqyrtim të gjitha pistat e mundshme, përfshirë edhe një pretendim përgjegjësie nga një grup islamist me lidhje të dyshuara me Iranin i quajtur Harakat Ashab al-Yamin al-Islamia.
Megjithatë, deri më tani nuk ka prova të drejtpërdrejta që konfirmon se Irani apo ndonjë shtet tjetër qëndron pas sulmit.
Hatzola është një shërbim vullnetar emergjent mjekësor i udhëhequr nga komuniteti hebre dhe që vepron prej vitit 1979 në veri të Londrës, duke ofruar ndihmë pa pagesë që përfshin edhe persona jashtë besimit hebre.
Ky incident ka ngjallur shqetësim të gjerë në Britani, sidomos te udhëheqësit e komunitetit hebre dhe politikanët, të cilët e dënuan si një akt të urrejtjes ndaj një shërbimi që shpëton jetë.
Grupi Harakat Ashab al-Yamin al-Islamia është përshkruar nga inteligjenca si një rrjet islamist militant i ngjashëm me organizata të mbështetura nga Irani, i cili ka pretenduar përgjegjësi për një valë të sulmeve antisemitike në disa vende evropiane, por autenticiteti i këtyre pretendimeve ende nuk është verifikuar zyrtarisht nga autoritetet./BBC/
