Dy të rinj janë ekzekutuar me varje në qytetin e Isfahanit, pasi u dënuan për vrasjen e katër efektivëve të forcave të sigurisë gjatë protestave masive të janarit.
Sipas raportimeve, gjatë natës, kur u përhap lajmi se në sheshin Alikhani po përgatiteshin vinçat për ekzekutimet, dhjetëra qytetarë dolën në rrugë në përpjekje për t’i ndalur ato. Mediat dhe burime lokale raportojnë se pati përplasje me policinë, e cila dyshohet se hapi zjarr ndaj protestuesve. Sipas gazetares Fatemeh Jamalpour, një grua humbi jetën gjatë incidenteve.
Në agim u ekzekutuan dy të rinjtë, të moshës 23 dhe 29 vjeç. Ata ishin pjesë e një grupi prej 12 të rinjsh të akuzuar për ngjarjet e protestave të 8 janarit 2026 në sheshin Alikhani të Isfahanit.
Ekspertët e Kombeve të Bashkuara kanë dënuar ashpër procesin gjyqësor, duke theksuar se ai nuk respektoi standardet minimale të drejtësisë ndërkombëtare. Sipas tyre, 12 persona u dënuan me vdekje në një seancë të vetme, me dyer të mbyllura dhe pa u sqaruar përgjegjësia individuale e secilit të pandehur.
OKB-ja deklaron se të rinjtë, shumica në fund të adoleshencës ose në fillim të të njëzetave, u arrestuan në mënyrë arbitrare, disa u zhdukën përkohësisht me forcë, u keqtrajtuan dhe u akuzuan mbi bazën e rrëfimeve të transmetuara në televizionin shtetëror. Sipas OKB-së, akuzat ndaj tyre mbeten të paqarta.
Më 19 korrik, edhe dy të rinj të tjerë nga i njëjti grup u ekzekutuan. Ndërsa disa të dënuar të tjerë, mes tyre edhe një i ri që sapo kishte mbushur 18 vjeç në kohën e arrestimit, rrezikojnë të ekzekutohen së shpejti.
Sipas OKB-së, në vitin 2026 të paktën 24 persona janë ekzekutuar në lidhje me protestat e janarit. Shumë prej tyre ishin pjesëmarrës në lëvizjen “Grua, Jetë, Liri”, e cila kërkonte më shumë të drejta dhe liri në Iran.
Aktivistët për të drejtat e njeriut paralajmërojnë se edhe tetë të rinj të tjerë, të dënuar për të njëjtën çështje, mund të ekzekutohen publikisht.
Sipas organizatës Iran Human Rights, që nga fillimi i vitit në Iran janë ekzekutuar mbi 370 persona, ndërsa vetëm në qershor u regjistruan 101 ekzekutime. Organizata thotë se ka marrë njoftime edhe për rreth 400 ekzekutime të tjera, por nuk ka mundur t’i verifikojë.
Shumica e të ekzekutuarve ishin dënuar për vrasje, trafik droge ose akuza që lidhen me sigurinë kombëtare. Sipas OKB-së, në shumë raste proceset gjyqësore kanë qenë të padrejta, pa të drejtë mbrojtjeje dhe me rrëfime të marra nën presion ose dhunë.
Ndërkohë, në burgun Ghezel Hesar në Karaj, dhjetëra të burgosur kanë hyrë në grevë urie prej disa javësh për të protestuar kundër numrit të lartë të ekzekutimeve. Disa prej tyre kanë qepur buzët në shenjë proteste.
Sipas organizatave ndërkombëtare, pas Kinës, Irani është vendi me numrin më të lartë të ekzekutimeve në botë.
