Irani do të vazhdojë programin e armatimit, veçanërisht balistik, për aq kohë sa do të jetë e nevojshme, deklaroi sot presidenti iranian, Hassan Rohani ndërkohë që Kongresi amerikan po përgatit sanksione të reja kundër programit raketor të Teheranit.
“Për të mbrojtur kombin tonë dhe integritetin tonë territorial, ne do të prodhojmë të gjitha armët për të cilat do të kemi nevojë”, deklaroi Rohani gjatë një fjalimi në Parlament publikuar nga televizioni shtetëror.
“Ne kemi ndërtuar raketat, po i ndërtojmë dhe do të vazhdojmë t’i ndërtojmë sepse kjo nuk shkel asnjë rregull ndërkombëtar dhe as rezolutën 2231 të Këshillit të Sigurimit të Kombeve të Bashkuara”, shtoi Rohani.
Miratuar në korrik 2015, kjo rezolutë konfirmoi marrëveshjen për programin bërthamor iranian të arritur mes Iranit dhe grupit të gjashtë fuqive (Gjermani, Kinë, SHBA, Francë, Britani e Madhe, Rusi).
