Një video e liderit suprem iranian po qarkullon në media, ku lihet të kuptohet se Mojtaba Khamenei përkundrejt spekulimeve për shëndetin, është në gjendje të mirë.
Por mediat ndërkombëtare kanë zbuluar se ajo është një video para sulmit të SHBA-Izrael me raketa dhe bomba në Teheran në muajin mars, ku ai u plagos rëndë.
Agjencia gjysmëzyrtare e lajmeve Mehr e Iranit ka publikuar në një platformë të mediave sociale një video të Mojtaba Khamenei-t, i cili nuk është parë në publik që kur u zgjodh udhëheqës suprem në fillim të marsit.
Videoja pa datë, e postuar në Telegram të dielën, tregon Khamenein duke folur me disa persona, shkruan Sky Neës.
Agjencia nuk ka bërë të ditur se kur dhe ku janë regjistruar pamjet, ndërsa nuk ka identifikuar as personat që ndodhen pranë tij.
Publikimi i videos vjen pasi në rrjetet sociale dhe në disa raportime u pretendua se Khamenei ishte shtruar në spital dhe se gjendja e tij shëndetësore ishte e rëndë. Deri tani, këto pretendime nuk janë konfirmuar në mënyrë të pavarur.
Khamenei pasoi të atin, Ajatollah Ali Khamenei, si udhëheqës suprem pasi 86-vjeçari u vra në një sulm ajror më 28 shkurt, ditën e parë të konfliktit me SHBA-në.
Khamenei u plagos rëndë dhe prej atëherë nuk është shfaqur kurrë në publik, edhe nga frika e një sulmi asgjësues të Izraelit, por edhe spekulimeve se ndoshta mund të jetë në gjendje tepër kritike për jetën.
