Ministri i Jashtëm iranian Abbas Araghchi i cilësoi si “konstruktive” bisedimet e tij me kryeministrin dhe ministrin e Jashtëm të Katarit, Sheikh Mohammed bin Abdulrahman Al Thani, në një kohë kur po intensifikohen përpjekjet për uljen e tensioneve në rajon.
Në një postim në X, Araghchi argumentoi se Uashingtoni duhet të pranojë se strategjia e sanksioneve nuk ka dhënë rezultat dhe të ndryshojë qasjen ndaj Teheranit. Sipas tij, për të krijuar kushtet për një afrim të ri, pala amerikane duhet të ndërtojë besim, ta trajtojë Iranin me respekt, të njohë të drejtat e tij dhe të respektojë angazhimet e veta.
Kontaktet po zhvillohen ndërkohë që Katari po përpiqet të mbajë të hapura kanalet e komunikimit në rajon, me vëmendje të veçantë ndaj zhvillimeve rreth Ngushticës së Hormuzit.
Sipas Ministrisë së Jashtme të Katarit, gjatë bisedimeve u shqyrtua një kuadër i propozuar gradual, i cili përfshin krijimin e një korridori të përkohshëm të përbashkët detar midis Iranit dhe Omanit.
Teherani dhe Maskati kanë zhvilluar gjatë javëve të fundit konsultime lidhur me lundrimin në këtë kalim me rëndësi strategjike, ndërsa vazhdojnë përpjekjet për normalizimin e situatës.
Ngushtica e Hormuzit është një nga rrugët më të rëndësishme detare në botë për transportin e naftës dhe gazit natyror, dhe zhvillimet në këtë zonë po ndiqen nga afër për shkak të ndikimeve të mundshme në tregun global të energjisë.
