Korpusi i Gardës Revolucionare Islamike i Iranit ka lëshuar një kërcënim të ashpër ndaj vendeve fqinje në Gjirin Persik.
Sipas këtij paralajmërimi, nëse territori ose infrastruktura e tyre përdoret për të sulmuar Iranin, atëherë prodhimi i naftës në të gjithë Lindjen e Mesme mund të marrë fund plotësisht.
Deklarata e fortë u bë nga komandanti i forcës ajrore-hapësinore të Gardës Revolucionare, gjenerali Majid Mousavi, i cili u citua nga agjencia shtetërore iraniane e lajmeve Fars.
Ai tha se fqinjët jugorë duhet ta dinë që “nëse gjeografia dhe instalimet e tyre vihen në shërbim të armiqve për të sulmuar kombit iranian, atëherë duhet të thonë lamtumirë prodhimit të naftës në Lindjen e Mesme.”
Ky kërcënim vjen në një periudhë tensionesh shumë të larta në rajon, ku Irani është në konflikt të drejtpërdrejtë me Shtetet e Bashkuara dhe Izraelin.
Në muajt e fundit janë raportuar sulme të ndërsjella, përfshirë goditje ndaj infrastrukturës energjetike dhe kërcënime reciproke për shkatërrimin e fushave të naftës dhe gazit.
Irani i sheh vendet e Gjirit si Arabinë Saudite, Emiratet e Bashkuara Arabe, Kuvajtin, Katarin dhe Bahrejnin si potencialisht të përfshira në çdo sulm kundër tij, pasi ato strehojnë baza ushtarake amerikane dhe janë aleatë të ngushtë të SHBA-së dhe Izraelit.
Ndikimi i një ndërprerjeje të tillë do të ishte dramatik për ekonominë globale. Lindja e Mesme prodhon rreth 30-35% të naftës botërore dhe çdo ndërprerje në shkallë të gjerë do të çonte në rritje të mëdha të çmimeve të naftës, duke krijuar krizë energjetike në shumë vende.
Në javët e fundit, zyrtarë iranianë kanë paralajmëruar se do të synojnë instalimet e naftës, gazit dhe madje impiantet e desalinimit të ujit në vendet e Gjirit nëse Irani sulmohet.
Vendet e Gjirit nuk kanë dhënë ende një reagim zyrtar ndaj kësaj deklarate specifike, por historikisht ato e kanë konsideruar çdo kërcënim iranian si të papërgjegjshëm dhe kanë forcuar bashkëpunimin ushtarak me Shtetet e Bashkuara.
Nga ana tjetër, SHBA-ja ka paralajmëruar se çdo sulm ndaj aleatëve të tyre do të përballet me përgjigje të ashpër ushtarake.
