Një shqiptar, i cili jeton dhe punon në Irlandë është bërë shpesh pre e sulmeve nga mafia irlandeze. Fatos Cufaj, 44 vjeç baba i 4 fëmijëve është pronar i 10 lavazheve në zonën e Belfastit, kryeqytetit të Irlandës së Veriut, por herë pas here bizneset e tij janë bërë pre e sulmeve.
Sulmi i rradhës ndaj bizneseve të tij është shënuar ditën e dielë, ku dy prej lavazheve të tij i’u është vënë zjarri duke shkaktuar dëme të konsiderueshme materiale.
“Ata kanë djegur çdo gjë. Dëmi është i konsiderueshëm. Unë e di kush e ka bërë. Të gjithë e dimë kush është. Unë dhe familja ime kemi ardhur nga Shqipëri për të bërë një jetë më të mirë këtu, por jeta ime është e kërcënuar çdo ditë” është shprehur shqiptari, por pavarësisht kësaj ka shtuar se është i vendosur për të ecur përpara.
Nuk është hera e parë që bizneset e Fatosit bien pre e sulmeve të ngjashme. Në tetorin e vitit 2008, kur Fatosi ishte pronar vetëm i një lavazhi, në muret e lavazhit u shkruan me bojë parrulla: “Të shporren drogaxhinjtë e huaj” . Megjithatë 44- vjeçari mohon të ketë lidhje me bandat e trafikut të drogës.
