Investimi në Sazan është interes i Ramës, por edhe i Shqipërisë

Nga Ervis Iljazaj

Investimi i dhëndrit të Presidentit Amerikan Donald Trump në ishullin e Sazanit ka rihapur edhe njëherë diskutime në opinionin publik, pasi sot doli vendimi i qeverisë për ta shpallur atë si investitor strategjik. Shumë zëra të opinionin publik kanë filluar edhe njëherë kritikat për këtë investim për shkak se e lidhin atë me një interes politik dhe personal të Edi Ramës për ë krijuar lidhjet e tij me Shtëpinë e Bardhë. Opozita shqiptare deri më tani ka mbajtur një qëndrim neutral, për shkak se investitori është një lidhje familjare me drejtuesin e Shtëpisë së Bardhë.

Në fakt ky është një investim që e ka bërë Partinë Demokratike të heshtë si rrallë ndonjëherë për investimet apo investitorët strategjikë të qeverisë. Duket qarë se opozita për shkak të interesit politik nuk ka asnjë kritikë për këtë investim kaq të madh.

Kritikat e vetme që vijnë në drejtim të këtij investimi janë pikërisht se pas tij ka një interes personal të Edi Ramës si një mënyrë për të krijuar lidhjet e tij me Shtëpinë e Bardhë. Po është e vërtetë. Rama padyshim që Sazanin ja ka ofruar këtij investitori edhe me këtë qëllim. Është naive të mendosh ndryshe. Por politikanët kanë gjithmonë interesat, kjo është një gjë që dihet. Ajo që ne duhet të gjykojmë është nëse interesat e tyre përkojnë me interesat e Shqipërisë apo jo. Dhe investimi në ishullin e Sazanit është një investim që i intereson ekonomisë, dhe mbi të gjithë turizmit shqiptar. Jo vetëm që do t’i jepte një impuls të ri këtij sektori, por do t’i jepte Shqipërisë edhe një publicitet pikërisht falë emrit të investitorit.

Ne duhetë të jemi të ndërgjegjshëm se pa investime të tilla, Shqipëria nuk mund të konkurojë dot me fqinjët në sektorin e turizmit, duke patur parasysh se rrethohemi nga kolosë botërorë në këtë fushë.

Dhe një investim i tillë kolosal, i bërë pikërisht nga familjarët e Presidentit të ShBA është një reklamë e mirë për vendin tonë. Që tani madje, pa filluar nga puna ende dhe vetëm në projekt ide, ky investim dhe Shqipëria, është në mediat kryesore botërore dhe amerikane, gjë e cila ndihmon sektorin e turizmit shqiptar. Sigurisht ky investim edhe pse me një investiror të tillë nuk do të thotë që të bëhet kundra ligjeve të Shqipërisë apo kundër interesavet të shqiptarëve. Gjithsesi është një investim që duhet të jetë transparent dhe në monitorim në këtë drejtim.

Mund të mirëkuptohen ata që e kritikojnë këtë investim nga pikëpmja ambjentaliste për shembull. Ka nga ata njërëz që mendojnë se natyra shqiptare edhe në bregdet duhet të mbtetet e paprekur sepse kështu është më mirë. Por ta kritikosh një investim vetëm se bëhet nga Edi Rama dhe ai ka interes politik apo diplomatik, pa marrë në konsideratë nëse Shqipëria fiton nga ky investim, është absurde.

Shpesh herë shoqërinë shqiptare e kaplon një nihilizëm i pakuptueshëm. Për shumë investime apo projekte ngrihen menjëherë kritika apo refuzohet apriori. Këtë e bëjnë pa dhënë alternativa se si zhvillohet turizmi në Shqipëri, si zhvillohet ekonomia apo sektorë të tjerë. Thjesht thonë jo për çdo gjë.

E vetmja mënyrë që ‘’të shpëtojë’’ Sazani sipas këtyre ideve është të lihet ashtu i shkretë. Mirëpo ashtu nuk kuptohet se çfarë vlere ka për Shqipërinë dhe për turizmin e saj. Në të kundërt, nëse nuk do të investojë dhëndri i Presidentit të ShBA, më shumë gjasa do të jetë ndonjë oligark vendas , ashtu sikurse ndodh shpesh herë. Më mirë një investim i huaj dhe serioz, se sa një investim nga këto alla shqiptare që s’dihet se kush janë dhe çfarë na sjellin. Aq më tepër që investimet amerikane janë të pakta në Shqipëri dhe duhet të jenë gjithmonë të mirëpritura. Prandaj ata që kritikojnë këtë investim duhet të në japin argumenta se përse janë kundra, përveç faktit se Edi Rama ka interes diplomatik apo politik.

Deri më tani, ende se kanë bërë.