Qeveria parashikon procedura të përshpejtuara për kontratat e investimeve në sektorin energjetikë, me kapacitet nën dy mega dhe vlerë mbi 100 milionë euro.
Komisioni i Kuvendit për Veprimtarinë Prodhuese, diskutoi sot projektligjin “Për një ndryshim në ligjin 125/2013 “Për koncesionet dhe partneritetin publik privat” të ndryshuar”, ku me propozim të mazhorancës dhe opozitës u parashtrua që inceneratorët dhe TEC-et që përdorin torfën, të mos përfshihen në këtë pr/ligj.
Zv. Ministrja e Infrastrukturës dhe Energjisë, Dorina Çinari, gjatë prezantimit të projektligjit tha se, “sot ka një interes në rritje të investitorëve të huaj dhe vendas për të zhvilluar kapacitete prodhuese të reja, në sektorin energjitik duke shfrytëzuar burime hidrike dhe ato alternative që ofrojnë resurset e vendit, por që stepen përballë procedurave të gjata që shkojnë gati rreth dy vjet të negociatave për koncesionet, ndërkohë që vendet e rajonit kanë procedura të përshpejtuara.
“Kjo është arsyeja që sot kemi ardhur me një propozim për shkurtimin dhe përshpejtimin e procedurave të dhënies me koncesion të kapaciteteve nën 2 mega dhe mbi 100 mln euro. Njëkohësisht është edhe harmonizimi me ligjin për energji të rinovueshme,” theksoi Çinari.
Sipas saj, sektori energjitik shqiptar shënon një konsum të madh kundrejt aftësisë për të prodhuar energji, pavarësisht burimeve që ofron vendi.
Nga viti 1999 Shqipëria është një importues neto të energjisë, dhe Shqipëria mbështetet kryesisht në prodhimin e energjisë në burime ujore. Kjo ka reflektuar natyrisht në kosto shumë të larta, të cilat herë pas here kanë vënë në vështirësi edhe sistemin elektroenergjitik shqiptar dhe financat në buxhetin e shtetit, ndaj lehtësirat proceduriale do të rrisin investimet në këtë sektor, u shpreh zv/ministrja./ata/a.m.
