Një memorandum bashkëpunimi pritet të nënshkruhet në muajin gusht mes Durrësit dhe qytetitport Shantou të Kinës. Mbi këtë event që pritet t’i hapë rrugë investimeve kineze në Durrës është diskutuar gjatë një takimi që ambasadorja e Republikës së Kinës në Tiranë, zonja Jiang Yu pati në Bashkinë e Durrësit me kryetarin Vagjush Dako.
Ambasadorja Yu foli për një rritje të interesimit të bizneseve kineze për të investuar në shumë sektorë në Durrës dhe në të gjithë vendin. Ndërsa kryebashkiaku Dako u ndal veçanërisht në sektorin e turizmit dhe atë ekonomik, si dhe në rolin e rëndësishëm të portit të Durrësit në ekonominë e vendit.
Më 14 gusht pritet që kryebashkiaku i qytetit Shantou të vizitojë Durrësin dhe të nënshkruajë memorandumin e bashkëpunimit. Shantou është një nga 5 zonat speciale ekonomike të Kinës, ku funksionon dhe Fondi i Rrugës Detare të Mëndafshit, një platformë e fuqishme investimi.
Ky qytet port, me një popullsi prej 5.5 milionë banorësh, njihet si “Meka Kulturore Bregdetare” për shkak të trashëgimisë së pasur kulturore.
