Ndërtimi i gazsjellësit Transadriatik (TAP) i konsideruar si një nder projektet më strategjike për ekonominë shqiptare, ka hyrë në fazën kulmore dhe këtë vit projekti pritet të investojë në ekonominë shqiptare një shifër që arrin sa 4 për qind e prodhimit kombëtar.
Sipas burimeve nga TAP, investimi do të luhatet gjatë këtij viti në nivelin e 400 milionë eurove. Kjo në varësi edhe nga ecuria e punimeve në terren, nga situata që mund të kërkojnë vëmendje më të veçantë në një moment të caktuar, ose nga lëvrimet e produkteve të ndryshme.
Gazsjellësi TAP është projekti më i madh i realizuar në ekonominë shqiptare, punimet e të cilit po ecin me ritëm të përshpejtuar.
Sikurse është bërë i ditur, investimi total i projektit TAP në Shqipëri është në nivelin e 1.5 miliardë eurove raporton ATA. Tashmë ky projekt është në vitin e dytë, ndërkohë që në vitin 2019 do të bëhet testimi i tubacioneve, mbushja me gaz, dhe komisionimi.
Gjurma e gazsjellësit nis në qytetin e Kipoit, në kufirin turko-grek. Në territorin shqiptar, ai hyn në zonën e Korçës dhe, pasi kalon përmes Beratit dhe Fierit, përfundon në Itali në rrugë nënujore.
Aktualisht TAP ka mbi 1.800 të punësuar direkt në Shqipëri dhe sipas një studimi të Universitetit të Oksfordit, projekti do të rrisë prodhimin e përgjithshëm të Shqipërisë të paktën me 150 milionë euro./a.m.
