Investimet e huaja direkte ruajtën rritjen në tremujorin e dytë të vitit. Banka e Shqipërisë raporton se në tre muaj sipërmarrësit e huaj investuan 226 milionë euro, tetë milionë euro më shumë krahasuar me të njëjtën periudhë të një viti më parë.
Për gjysmën e e parë të vitit, vlera e investimeve të huaja direkte arriti në 512 milionë euro, vetëm katër milionë euro më shumë krahasuar me 6-mujorin e parë të vitit 2018. Pasi investimi më i madh i viteve të fundit, gazsjellësi Trans-Adriatik, e përmbushi pjesën dërrmuese të investimit të parashikuar, pritej që fluksi i investimeve të huaja në Shqipëri të binte ndjeshëm. Për momentin, kjo nuk ka ndodhur dhe investimet e huaja po rezistojnë në vlera të konsiderueshme.
Të paktën deri në fund të tremujorit të parë, sektori që dominonte investimet e huaja ngelej energjia, ku veç gazjellësit TAP, një peshë të rëndësishme mbante ndërmarrja Devoll Hydropower, me investimin në kaskadën e lumit Devoll. Të tjerë sektorë ekonomikë me peshë të konsiderueshme janë industria nxjerrëse dhe shërbimet, sidomos të përqendruara në sektorin financiar dhe në shërbimet administrative e mbështetëse, ku përfshihen ndërmarrjet call-center.
Megjithëse në vitet e fundit nuk janë regjistruar projekte të reja madhore investimesh të huaja, një rol të rëndësishëm vazhdojnë të luajnë investimet e ndërmarrjeve të huaja ekzistuese. Fitimet e riinvestuara nga këto ndërmarrje për gjysmën e parë të këtij viti arritën në 183 milionë euro, 68% më shumë krahasuar me të njëjtën periudhë të vitit 2018.
Sipas origjinës së kapitalit, në vitet e fundit investimet e huaja janë dominuar nga Zvicra dhe Hollanda.
Në Zvicër është e regjistruar ndërmarrja që po ndërton gazsjellësin TAP, ndërsa në Hollandë është e regjistruar Statkraft Markets, kompania përmes të cilës norvegjezët e Statkraft zotërojnë Devoll Hydropower.
