Ministrja e Financave dhe Ekonomisë, Anila Denaj deklaroi sot se “ne kemi gati 15 projekte strategjike që po shihen me objektivin për të investuar në Shqipëri dhe që vijnë nga vende të ndryshme të botës”.
E ftuar në studion e emisionit “Java në RTSH”, Denaj duke preferuar të mos flasë me emra kompanish, tha se bëhet fjalë për investime në sektorët e energjisë, infrastrukturës dhe turizmit”. “Këto janë edhe tre fushat kryesore për të zhvilluar ekonominë. Sa i takon investimeve të huaja një numër më i madh projektesh krijon një diversitet më të madh”, tha ajo.
Në turizëm, Denaj tha se kemi projekte që lidhen me zona të caktuara bregdetare, ashtu sikurse kemi edhe për porte dhe aeroporte.
Denaj u shpreh se stabiliteti politik sjell stabilitet për shoqërinë dhe ekonominë, ndërsa theksoi se ka trend pozitiv për rritjen e të ardhurave. Ajo theksoi se “është e rëndësishme që bashkëpunimi të jetë afatgjatë për çdo reformë.
Duke folur për programin e rindërtimit, Denaj tha se “për Konferencën e Donatorëve ne presim angazhim pasi kemi punuar me një produkt që lexohet kollaj nga donatorët me BB, delegacionin e BE-së dhe UNDP-në”.
“Këtë vit buxheti i shtetit parashikoi 20 miliardë lekë për programin e rindërtimit. Nëse nevoja na del për një vlerë më të madhe do ta shtrijmë mbështetjen buxhetore në 2 po 3 vite të tjera”, tha ajo.
Lidhur me koncesionet, Denaj tha se tavani është 5% dhe buxheti nuk jep ok për një kontratë nëse kalohet 5%. Deri tani, tha ajo, jemi në nivelin 3.3%.
/a.r
Shume mire qe ka interes per investime strategjike, por kryesorja eshte te jene kompani serioze dhe jo off shore ,qe ikin dhe nuk paguajne detyrimet shteterore