Drejtoria Rajonale Tatimore Tiranë njofton bizneset se kontrollet tatimore për mallrat dhe materialet nisin nga 5 janar 2016 dhe se në këtë kontroll do të bëhet verifikimi i inventarit të mbylljes së vitit, me atë fizik. Nëse nuk dorëzohen inventarët, tatimet paralajmërojnë se do të jenë të detyruara të mbyllin aktivitetet e bizneseve deri në dorëzimin e tyre tek grupet e kontrollit…
Drejtoria Rajonale Tatimore Tiranë, njofton se duke filluar nga 01.01.2016 do të ushtrojë kontrolle tek të gjithë tatimpaguesit nën adminstrimin e saj në lidhje me verifikimin e gjendjes së mallrave e materialeve.
Verifikimi i gjendjes së mallrave dhe materialeve, njoftojnë Tatimet, është pjesë e detyrimeve ligjore të bizneseve.
Konkretisht kërkohet që brenda datës 05.01.2016, të bëhen gati për tu verifikuar inventarët si më poshtë:
Inventari kontabël i mallrave për shitjes të datës 31.12.2015
Inventari kontabël të lëndëve të para të datës 31.12.2015
Inventari i prodhimit në proces i datës 31.12.2015
Inventari i produktit të gatshëm i datës 31.12.2015
Drejtoria e Tatimeve Tiranë njofton se inventarët duhet të jenë të detajuar në artikuj, njësi, sasi, çmim, vlerë dhe të ndarë sipas adresës së ushtrimit të aktivitetit të biznesit në fjalë (qoftë magazinë, pikë shitje me shumicë, pakicë etj.)
Gjithashtu, bëhet e ditur se fletët e inventarëve duhet të jenë të nënshkruar në çdo faqe nga administratori i tatimpaguesit dhe të vulosura.
Tatimet kanë deklaruar se bizneset që kanë bërë vetëdeklarimin e mallit që kanë në gjendje pa dokumente tatimore, me anë të një fature të përgatitur nga blerësi, brenda datës 31 dhjetor 2015, nuk do të penalizohen sipas pikave të përcaktuara në ligj. (Procedurat e vetëdeklarimit të mallrave gjendje nga tatimpaguesi përcaktohen me Udhëzim të Ministrit të Financave, i cili do të dalë së shpejti në faqen zyrtare të Drejtorisë së Përgjithshme të Tatimeve “tatime.gov.al”).
Tatimet sqarojnë se Tatimpaguesit nuk përfitojnë nga kjo dispozitë, nese shkelja, sipas pikave 1, 2 dhe 4, të nenit 121 të ligjit 9920 datë 19.05.2009 “Për Proceduarat tatimore në Republikën e Shqipërisë i ndryshuar me ligjin 99/2015, date 23 .09.2015 (Botuar ne Fletoren Zyrtare Nr. 187, date 28 tetor 2015)”, është konstatuar paraprakisht nga administrate tatimore.
Si rrjedhojë, tatimet u kërkojnë bizneseve që në gjendjet inventariale të 31.12.2015 të përfshijnë dhe mallrat për të cilat nuk kanë disponuar dokumentacion të rregullt tatimor por që kanë përgatitur faturën sipas parashikimeve të nenit 53, të ligjit 9920 date 19.05.2009 “Për Proceduarat tatimore në Republiken e Shqipërisë i ndryshuar.
Drejtoria e Tatimeve njofton se inventarët u dorëzohen grupit të inspektorëve që janë të autorizuar të bëjnë kontrollin në terren.
Në fund, tatimet paralajmërojnë se “në rast se nuk i dorezoni inventarët e kërkuar, jemi të detyruar t’u bëjmë mbyllje aktiviteti deri në azhonimin dhe dorëzimin e këtyre inventareve tek grupit të kontrollit. Procedura e kontrollit vijon pasi ju të keni dorëzuar paraprakisht inventaret kontabël të 31 .12.2015”.
MONITOR
