Pamjet e rrëzimit të bustit të diktatorit Enver Hoxha në 20 Shkurt të vitit 1991 janë bërë objekt i një beteje të gjatë ligjore në Gjykatën e Tiranës. Operatori që ka fiksuar ato momente historike për vendin tonë Fatmir Çepani, ka paditur disa subjekte dhe persona që sipas tij kanë përdorur me qëllim fitimi pa të drejtë një produkt të tij.
Bëhet fjalë për videon e shndërruar në hit, sa herë televizionet shqiptare transmetojnë materiale nga 20 Shkurti i vitit 1991, kur në Sheshin “Skënderbej” u rrëzua busti i Hoxhës. Mes personave të paditur është edhe sopranoja Inva Mula, e cila në këngën e saj “Globi rrotullohet”, sipas paditësit ka transmetuar pamje nga videograma “20 shkurti, rënia e bustit të Enver Hoxhës”.
Po ashtu është paditur nga fatmir Çepani edhe kompania Vodafone e cila ka sponsorizuar këngën e Inva Mulës. Kjo kompani ka arritur të dalë fituese në procesin civil në Gjykatën e Tiranës, ku Çepani kërkonte dëmshpërblim pasi e akuzonte për veprën e “Riprodhimit pa të drejtë të veprës së tjetrit”.
*Fatmir Çepani, autori i filmimit të pamjeve të rrëzimit të bustit të Enver Hoxhës
ARGUMENTIMI I GJYKATËS
Gjykata vëren, se neni 149 i K.Penal merr në mbrojtje një kategori të caktuar të veprave të autorit, që janë veprat letrare, muzikore, artistike ose shkencore.
Në nenin 4, të Ligjit nr. 9380, dt. 28.04.2005 “Për të drejtën e autorit dhe të drejtat e tjera të lidhura me të”, jepen përkufizime të veprës artistike, veprës letrare, veprës muzikore, veprës arkitekturore, veprës teatrore, veprës dramatike, vizatim, gravure, videogramit, skulpturës, etj.
Videogrami, objekt i këtij gjykimi, është evidente që nuk është as vepër letrare, as muzikore dhe as shkencore.
Vepër artistike do të quhet çdo krijim origjinal, intelektual i një personi fizik, ndërsa “Videogrami “20 shkurti, rënia e bustit të Enver Hoxhës”, objekt i këtij gjykimi është videogram, filmim i një momenti historik dhe jo krijim origjinal i të dëmtuarit akuzues Fatmir Cepani.
