Inva Mula, fton shqiptarët të jenë në Prishtinë në Ditën Botërore të Bamirësisë
Sopranoja e njohur Inva Mula përmes një promoje fton të gjithë shqiptarët të jenë pjesë e manifestimit të madh, më 5 shtator në Prishtinë, në Ditën Botërore të Bamirësisë ku do të interpretohet zyrtarisht Himni për Nënën Terezë.
Himni u rregjistrua me 19 korrik në Tiranë në sallën e Teatrit të Operas dhe Baletit, nën dirigjimin e maestro, Bujar Llapaj, orkestrim te kompozitorit Genc Tukiçi, dhe interpretimin e divës Inva Mula, solistes nga Maqedonia, Sihana Badivuku, shoqëruar nga orkestra gjithëkombëtare dhe kori i Filharmonisë së Kosovës drejtuar nga Baki Jashari dhe organizim te Arben Skenderit,
Ky testament moral i njerëzimit që kombi shqiptar do t’ia dhurojë botës u bë realitet, falë përkushtimit, dashurisë dhe sakrificës që treguan të gjithë pjesëmarësit dhe përkundër temperaturës tropikale që mbisundoi dhe gjatë 4 orëve sa zgjati audio regjistrimi i himnit. Puna e nisur me përkushtim, do të vazhdojë të kurorëzohet më 5 shtator në qendër të Prishtinës, në sheshin që mban emrin e Nënë Terezës , me një petk solemn dhe nën moton e besëlidhjes shqiptare.
“Ejani ta përurojmë këtë himn, sepse vetëm kështu dëshmojmë se dimë t’i çmojmë vlerat tona që kemi, por dimë ato t’i shpërndajmë dhe tia dhurojmë botës një pjesë të shpirtit tonë . Mbetemi me shpresë se të dy shtetet tona do të lobojnë intensivisht përmes kanaleve diplomatike e institucionale që vitin e ardhshëm shenjtërimit të Nënës Tonë t’i paraprijë himni i cili do të interpretohej live nga elita jonë artistike, në shqip e anglisht në Vatikan”, thotë Dijana Tosku ideatorja e këtij projketi.
Në dhjetor të vitit 2014, teksa në Shkup po mbahej simpoziumi kushtuar 100 vjetorit të vdekjes së pagëzuesit të Nënës Tereze, Don Zef Ramaj, Dijana Toskës i lindi ideja që poezinë e shkruar nga duart Nënë Terezës,ta shndërroj në një testament që do të shërbejë si kod moral i bekimit të njerëzimit. Me shumë dashuri e energji të pakursyer gazetarja e njohur po punon që kjo ëndër të realizohet dhe me 5 shtator të gjithë të dëgjojmë së bashku tingujt e Valsit Hyjnor.
Ka përzgjedhur poezinë “Lamtumirë” shkruar nga bamirësja e madhe në anije kur po largohej më 1928 për në Kalkutë, Indi. Muzikën e kishte shkruar kusheriri i saj, Lorenc Antoni me kërkesë të Don Lush Gjergjit, pak para vdekjes së tij. Me 5 janar, në Katedralen në Prishtinë, Dijana takoi, Don Lush Gjergjin ku i paraqiti projekt idenë për Himnin dhe shtëpinë e Nënës Terezës i cili përçon tri mesazhe: universal, fetar e kombëtar. Ky Himn do ti paraprijë, Shenjtërimit të Nënës Tereze në vitin 2016 nga Vatikani dhe njëherit vendosjes së gurthemelit të shtëpisë së Nënës Terezës në Prishtinë. Ky është Himni që populli shqiptar do t’i falë botës dhe çdo manifestim kudo në botë që do të organizohet për Nënën Terezë, do të përcillet me Himnin e saj. “Do kërkojmë që në të gjitha ëeb-et e organizmave ndërkombëtarë, duke filluar nga OKB-ja e Vatikani, të vendoset Himni i Nënë Terezës”, tregon Dijana Tosku për ATSH-në.
