Një javë më parë Flamurtari fitoi kundër Partizanit me një penallti në minutat e fundit, ndërsa sot skuadra vlonjate e pësoi nga një e tillë duke i hequr mundësinë e 3 pikëve.
Në intervistën pas ndeshjes, trajneri i vlonjatëve, Shpëtim Duro, nuk është kursyer aspak ndaj arbitrave duke i cilësuar kamikaz, njëjta si në disa raste të mëparshme.
Flamurtari merr pikën e parë në këtë stadium. I zhgënjyer pasi ishit pranë fitores?
Një pikë e rëndësishme. Sot e kishim rival direkt Kukësin. Jam i mërzitur pasi Kukësi nuk e meritoi barazimin. Kamikaz Hamiti na ka sakatuar. Jam i mërzitur që nuk fituam. Me këtë grup që pashë në fushë, nuk mendoj se kemi barazuar. Myrtaj, një kamikaz tjetër e ka dhënë penalltinë, ai pas porte. Na kanë sakatuar edhe me kartona të verdhë, edhe për Siljanoskin që në minutën e parë. Më sakatoi edhe për ndeshjen tjetër.
Nuk e keni ndërruar gjuhën?
Ju drejtohem juve, gazetarëve, unë kam 1 vit në Vlorë. Është ndeshja e dytë që ky arbitër mban Kukësin me Flamurtarin. Para 3 ditësh, ky arbitër ka mbajtur Kukësin dhe në Shkodër.
Patëm edhe një rast në fund të pjesës së parë, ku nuk dha penallti për ne. Aty mbaronte 2-0 pjesa e parë dhe gjërat ishin ndryshe. Edhe tek goli, arbitri kryesor dhe ai pas porte, po prisnin çfarë vendimi do merrnin, pasi nuk e besonin që shënoi Vlora. (Balkanweb)
