Mazhoranca përcaktoi dje kandidaturën për kryebashkiak të Dibrës, mjekun 48-vjeçar, Muharrem Rama. Në një intervistë për “Shekullin” ai tregon arsyet pse do të dalë fitues përballë kandidatit të PD-së, Sherefedin Shehu. Ai thotë se dibranët e njohin kontributin e tij si mjek dhe ndryshe nga rivali i tij, i cili jeton në Tiranë, ai thotë se jeton çdo ditë me hallet e qytetarëve.
Çfarë do të thotë për ju të jeni kandidat i së majtës për bashkinë e Dibrës?
Është një përgjegjësi dhe një vlerësim për mua dhe familjen time. Unë jam me bindje i majtë dhe si mjek kirurg në Peshkopi ka 20 vjet që i shërbej komunitetit të Dibrës. E majta do të jetë fituese. Kemi mbështetjen e të gjithë koalicionit të majtë. Emri im është konsensual. Kam mbështetjen e PDIU-së dhe LSI-së.
LSI nuk do të nxjerrë kandidat të vetin?
Aktualisht nuk kam informacion për këtë që thoni ju. Unë jam i bindur që në fund LSI dhe PS-ja do të arrijnë të dakordësohen për të mbështetur emrin tim.
Ish-kryetari i Dibrës, të cilit i është ndërprerë mandati për shkak të skandalit të dalë në media, mendoni se mund t’ju dëmtojë?
Nuk do të na dëmtojë. Tashmë ai ka marrë ndëshkimin nga drejtësia shqiptare për atë që ka bërë. Unë kam dinjitetin tim dhe nuk ka pse të jetë ky më problem për mua. Nuk duhet të ndalemi duke komentuar se çfarë ka ndodhur me ish-kryetarin, por duhet të punojmë të gjithë që të shpalosim idetë tona për të nxjerrë nga varfëria dhe problemet Dibrën.
Kundështari juaj, z. Sherefedin Shehu, është një nga figurat e rëndësishme të së djathtës. Si e shihni ballafaqimin me të?
Unë i përkas të majtës, ndërsa ai i përket të djathtës. Unë jam banor në Dibër dhe mua më njohin nga afër i gjithë komuniteti. U shërbej çdo ditë qytetarëve të Dibrës. Në këtë pikë unë jam i avantazhuar. Unë besoj se ne do të fitojmë këto zgjedhje më thellë se zgjedhjet lokale të fundit. Nga të gjithë kontaktet që kam pasur gjatë këtyre ditëve kam parë se propozimi im është mirëpritur.
Dibra është nga bashkitë më të varfëra në vend. Çfarë do të bënit ju konkretisht për të ndryshuar gjendjen në Dibër?
Gjendja në infrastrukturë është e lënë pas dore dhe për këtë duhet një angazhim shumë i madh nga ana jonë. Vitin e fundit qeveria ka rritur interesimin për të investuar në bashkinë e Dibrës dhe jam i bindur se kjo vetëm sa do të rritet më shumë. Por njëherë letë fokusohem te fusha e cila na pret deri në ditën e zgjedhjeve. Ministri Damian Gjiknuri është i deleguar për të drejtuar shtabin elektoral në fushatë. Të gjitha strukturat e së majtës dhe i gjithë koalicioni do të bashkëpunojnë për të matrealizuar programin tonë për Dibrën e “Rilindur”. Bujqësia dhe Blegtoria janë sektorët më të rëndësishëm. Do të kërkojmë që të përmirësojmë të gjitha kushtet e nevojshme për ‘to.
E keni ngritur ekipin?
Ekipin e kam gati. Strukturat e PS-së së Dibrës dhe të koalicionit janë gati dhe të motivuar për t’u përballur me kundërshtarët. Ekipi im do të njihet në teren me problemet e të gjithë banorëve të Dibrës. Oferta jonë do të jetë konkrete.
Isuf Kurtaj
ma.me
