Sali Berisha tërhiqet nga qëndrimi se me ardhjen e tij në pushtet SPAK do të shkrihet. Nga selia blu, lideri demokrat pohoi se deklaratat e tij janë nxjerr jashtë kontekstit, duke sqaruar se në çdo rast ka kërkuar që të mos kishte një prokurori politike.
Kjo zmbrapsje erdhi vetëm pak orë pas Edi Rama deklaroi se Berisha pret vetëm një fishkëllimë prej Kryeministrit për ta shkrirë SPAK-un.
“Tani, nuk duhet, mendoj unë, të bëjmë interpretime jashtë kontekstit. Ajo që kam deklaruar dhe deklaroj unë, se kurrë në qeverisjen e PD, Shqipëria nuk do të ketë prokurori politike”, tha Berisha.
Pavarësisht se e quan një prokurori politike, kreu i opozitës mori në mbrojtje prokurorin Ols Dado, përballë atyre që i quan sulme të Erion Veliajt. Një ditë më parë kreu i arrestuar i Bashkisë Tiranë akuzoi Dadon se kishte përdorur ndaj tij fjalën “ndyrësirë”, gjë që më pas u mohua nga SPAK. Këto akuza sipas Berishës janë falsifikime të dënueshme, ndaj paralajmëron padi penale ndaj kryebashkiakut.
“Me mashtrimin e djeshëm ndaj publikut, Erion Veliaj tregoi se, për t’i shpëtuar krimeve që ka kryer është i aftë të ndërmarrë çdo veprim. Dje ai e përshkallëzoi qëndrimin e tij kriminal. E përshkallëzoi duke mashtruar qytetarët shqiptarë, sikur prokurori i paska thënë atij një fjalë të dënueshme”, shton kreu i PD.
Një koment e pati dhe për lëvizjen e Kryeministrit Edi Rama, i cili ka pranuar një dëgjesë me rektorin e Universitetit Bujqësor pas 34 urdhër arresteve në këtë institucion.
“Edi Rama është në tmerr, është në panik. Dëshmojnë shumë qartë se, kërkon që çdo urdhërarresti para se të ekzekutohet apo të lëshohet të kalojë nga zyra e tij, të marrin lejen e tij”, shtoi ai.
Berisha akuzoi mazhorancën se po zhdukin dokumentet shtetërore, ku sipas në bashkinë e Tiranës po digjen dhe grisen mijëra të tilla.
