Në vetëm katër muaj, agjentët imobiliarë thonë se mijëra qytetarë kanë aplikuar për të rivlerësuar pronën e tyre, duke përfituar nga fushata me normë tatimore 5%.
“Nga statistikat e 2-3 muajve të parë të fushatës, rezulton se këtë vit do të jemi shumë mirë me procesin e riverlësimit. Nëse vitet e kaluara kanë qenë diku te 33-35 mijë aplikime, këtë vit duhet të jenë diku te 55-56 mijë”, thotë Reinaldo Pipiria, Shoqata e Ndërmjetësve të Pasurive të Paluajtshme.
Veç Tiranës, një interes i lartë për të rivlerësuar pasurinë është vënë re edhe në zonat bregdetare, veçanërisht në Vlorë. Por ekspertët e tregut thonë se duhet ende kohë për të kuptuar nëse këto prona dalin në treg për shitje.
“Është shumë herët sepse duhet të përpunohet edhe një e dhënë tjetër, që janë kontratat e shitblerjes. Nëse në fund të vitit, për shembull kemi 50 mijë aplikime dhe 25-30 mijë kontrata shitblerje, pjesa tjetër e pronave janë rivlerësuar vetëm për t’u afruar me vlerën e tregut”, thotë Pipiria.
Për shkak të numrit të lartë të aplikimeve, edhe Tatimet po mbledhin më shumë të ardhura.
“Në mars, prill, maj qershor tatimet kanë arkëtuar rreth50 milionë euro nga rivlerësimi. Nëse shohim dy vitet më të mira, 2022 dhe 2025, që janë vitet më të mira për mbledhjen e tatimit që vjen nga transaksionet e pasurive të paluajtshme, jemi dy herë më mirë se këto dy vite. Deri në fund të këtij viti, për shkak të rivlerësimit, tatimet do të grumbullojnë të paktën dyfishin e 2022 apo 2025, që ishin vitet më të mira, nëse ndjekim këtë trend mujor”, tha Pipiria.
Fushata e rivlerësimit nisi zyrtarisht në fund të muajit shkurt dhe do të zgjasë deri në dhjetor.
