Autoritetet e sigurisë njoftohet se po i përdorin më dendur të dhënat e celularëve për të konstatuar fshehtas vendndodhjen e të dyshuarve. Edhe të dhënat e lidhjes me shtyllat e telefonisë celulare kontrollohen më shumë.
Mbrojtja e Kushtetutës (Shërbimi i fshehtë i brendshëm i Gjermanisë) dërgon gjithnjë e më dendur të ashtuquajtura mesazhe të heshtura sms, për të konstatuar vendndodhjen e personave të caktuar. Kjo rezulton nga një përgjigje me shkrim e qeverisë gjermane dërguar Grupit Parlamentar E Majta në Bundestag, përgjigje të cilën e ka lexuar gazeta gjermane “Handelsblatt”. Në gjysmën e dytë të vitit 2017, Shërbimi i fshehtë i Brendshëm i Gjermanisë ka dërguar rreth 180.000 mesazhe të tilla të fshehta në celularët e të dyshuarve. Në të njëjtën periudhë një vit më parë, ky institucion pati dërguar 144.000 herë mesazhe të tilla.
Edhe Zyra Federale e Policisë Kriminale (BKA) bëhet e ditur se e përdor gjithnjë e më shumë këtë metodë: BKA ka dërguar në gjashtë muajt e fundit të 2017-ës rreth 22.000 mesazhe sms të tilla – rreth 5000 më shumë se në gjysmën e dytë të 2016. Personat që u dërgohen mesazhe të fshehta tww shkurtra sms nuk e kuptojnë që ua kanë dërguar.
Policia Federale përdor më dendur metoda përgjimi
Edhe në kërkimin e informacionit nga stacionet bazë të telefonisë celulare përgjimi është zgjeruar. Operatori i telefonisë celulare, kur i kërkohet, raporton të gjitha numrat e celularëve, të cilat kanë komunikuar në një moment të caktuar me celulë të telefonisë celulare. Zyra Federale e Policisë Kriminale e shfrytëzoi këtë mundësi 376 herë në pjesën e dytë të vitit 2017, një vit më parë kjo mundësi u shfrytëzua vetëm një herë.
Policia Federale e shfrytëzoi veçanërisht dendur të ashtuquajturin Imsi-Catcher për të përgjuar bisedat telefonike – 61 herë u përdor së fundi ky instrument përgjues – në një kohë që në vitin 2016 kjo ndodhi vetëm në tetë raste./DW/ma.me
