Ministri i Jashtëm, Igli Hasani do të zhvillojë ditët e ardhshme vizitë zyrtare në Qipro dhe në Greqi. Bëhet me dije se me datë 2 qershor, Hasani do të udhëtojë drejt Qipros, ku do të takohet me homologun qipriot, Constantinos Kombos. Më pas ai do të zhvillojë takime edhe me Presidentin e Republikës së Qipros, Nikos Christodoulides, Presidenten e Dhomës së Përfaqësuesve, Annita Demetriu dhe të tjerë përfaqësues të lartë. Në fokus të vizitës në Qipro, do të jetë thellimi i marrëdhënieve dypalëshe në fusha me interes të ndërsjellë, si dhe bashkëpunimi rajonal, në Evropë, e më gjerë.
Në Greqi, Hasani do të zhvillojë vizitën zyrtare me 3 qershor, ku do të takohet me Ministrin e Punëve të Jashtme të Republikës së Greqisë, George Gerapetritis. Në fokus të bisedimeve do të jetë intensifikimi i dialogut politik dhe bashkëpunimit ekonomik, si dhe nevoja për të avancuar projekte konkrete në dobi të qytetarëve të të dy vendeve.
Në Greqi, Hasani do të pritet gjithashtu nga Presidenti Konstantinos Tassoulas, si dhe do të jetë i ftuar në Institutin ELIAMEP për të referuar mbi stadin e rrugëtimit të Shqipërisë drejt integrimit evropian.
