Tridhjetë intelektualë të njohur nga 21 shtete të ndryshme të Evropës kanë thënë se vlerat liberale të Evropës po përballen me sfidën më të vështirë që nga vitet e tridhjeta të shekullit të kaluar, në një periudhë kur Britania e Madhe pritet të largohet nga BE-ja dhe nacionalistët po pritet të fitojnë më shumë ulëse në zgjedhjet e parlamentit evropian.
Grupi i historianëve dhe laureatëve të Nobelit, të cilët e kanë publikuar një manifest në gazeta të ndryshme, kanë thënë se Evropa si ide po ndahet para syve të të gjithëve. “Duhet ta mbrojmë Evropën ose të zhdukemi nën valët e populizmit. Duhet ta rikthejmë vullnetarizmin politik ose në të kundërtën do të rrethohemi nga ndjenja e mërzitshme e urrejtjes”, thuhet në këtë dokument.
Sipas këtyre intelektualëve, nëse nuk bëhen përpjekje më të mëdha për ta luftuar rritjen e populizmit, zgjedhjet e BE-së do të jenë më të dëmshmet që i kemi përjetuar ndonjëherë. Në mesin e autorëve të këtij manifesti janë filozofi Bernard-Henri Levy, shkrimtarët Ian McEwan dhe Salman Rushdie, historiani Simon Schama dhe laureatët e Nobelit: Svetlana Alexievitch, Herta Muller, Orhan Pamuk dhe Elfriede Jelinek.
“Evropa tash është në rrezik më të madh se kurrë më parë në shtatëdhjetë vjetët e fundit dhe nëse dikush beson në këtë ide, është koha që të ngrihet dhe ta mbrojë atë”, ka thënë shkrimtari Rushdie. Në anën tjetër, shkrimtari turk, Orhan Pamuk, ka thënë se Evropa është e rëndësishme edhe për vendet joperëndimore. “Pa idenë e Evropës së bashkuar, liria, të drejtat e grave, demokracia dhe barazia vështirë se mund të mbrohen në pjesën time të botës”, ka thënë ai.
Shumica e analistëve dhe vëzhguesve kanë parashikuar se partitë nacionaliste dhe ato që janë kundër imigrantëve do të fitojnë mbështetje më të madhe në zgjedhjet që mbahen në maj të këtij viti. Shumë prej këtyre partive tashmë kanë shënuar rritje në zgjedhjet kombëtare. Kryeministri i Hungarisë, Viktor Orban, ka thënë se këto zgjedhje janë mundësi e mirë për t’i thënë lamtumirë demokracisë liberale, shkruan “The Guardian”.
/a.meta
