Është prezantuar sot Programi Kombëtar për Përgatitjen e Biznesit për Integrimin në Bashkimin Evropian, në bashkëpunim me komunitetin e biznesit, me synim mbështetjen dhe përgatitjen e sipërmarrjeve shqiptare drejt Tregut Unik Europian.
Në aktivitet, Kryeministri Edi Rama theksoi rëndësinë e përgatitjes së biznesit shqiptar për sfidat që sjell procesi i integrimit në BE, duke e cilësuar atë si një transformim të pashmangshëm.
“Guximi shpërblen kur mbështetet nga një vizion i qartë, nga një vullnet i fortë dhe nga ideja se e ardhmja nuk ndalet, ajo vjen, ndërsa e shkuara nuk kthehet, ka ikur. Këtu jemi pikërisht për të ardhmen që vjen dhe për t’u përballur me ndryshimin që po afrohet me shpejtësi, që është anëtarësimi në BE,” u shpreh Rama.
Ai tha se qeveria ka angazhuar krijimin e këtij programi kombëtar, i cili do të mbështetet edhe nga ekspertiza e UNDP-së, me qëllim ofrimin e asistencës profesionale për sipërmarrjen shqiptare.
Rama theksoi se rritja e mbështetjes për biznesin, veçanërisht për sipërmarrjet e vogla dhe të mesme, është thelbësore në këtë fazë. Kryeministri njoftoi gjithashtu programin “Dyfisho biznesin tënd”, i cili do të shoqërohet me një garanci sovrane dhe një portofol financimi për sipërmarrjet që synojnë zgjerim dhe zhvillim.
“Jemi në kushtet kur na duhet nga njëra anë të rrisim mbështetjen për sipërmarrjen. Ky është sistemi ku pa sipërmarrësin ka vetëm iluzione dhe humnera pas tyre. Për këtë arsye ne duam që në radhë të parë sipërmarrja e vogël dhe e mesme shqiptare të ketë sot shansin që nëse ka kapacitetin e kurajën e mjaftueshme, e idesë së qartë për të nesërmen dhe të vullnetit të domosdoshëm për ta çuar përpara me kurajë- të ketë mbështetjen tonë dhe mbështetja jonë për këtë kategori është domethënëse që do të materializohet në ditët e ardhshme të programit kombëtar ‘Dyfisho biznesin tënd’. Një garanci sovrane dhe një portofol financimi në mbështetje të gjithë atyre që do duan të ngjiten më lartë, të rrisin volumin dhe të përgatiten për të mos u goditur nga era e fortë e këtij transformimi”, tha Rama
Sipas tij, mbështetja do të realizohet përmes linjave të kreditimit nga Banka e Shqipërisë dhe marrëveshjeve me bankat e nivelit të dytë, duke u dhënë bizneseve akses më të lehtë në financim.
“Çdo sipërmarrës i vogël dhe i mesëm që ka gjithçka përveç financimit do ketë financimin, falë linjës së kredisë së BSH dhe marrëveshjet që kemi bërë me banka të nivelit të dytë. Ne nuk do të ndalemi te një kuotë financimi se ajo që kemi parashikuar, nëse do kemi nevojë për më shumë do bëjmë më shumë. Por pikërisht për të lehtësuar këtë proces do të shërbejë dhe asistenca për përgatitjen e planeve të biznesit”, tha kreu i qeverisë.
