Integrimi i Shqipërisë në Bashkimin Europian dhe marrja e kryesimit të OSBE nga vendi jonë, duket se e kanë përfshirë kryeministrin Edi Rama që të udhëheqë këto dy proces.
Pas vizitës së dy ditëve më parë që zhvilloi në Ukrainë, në cilësinë e kryetarit të OSBE-së, shefi i qeverisë shqiptare do të vizitojë sot Italinë.
Ai do të qëndrojë në Romë, ku paraditen e sotme në orën 10:30 do të ketë një takim me homologun e tij italian, Conte. Mësohet se në fokus të diskutimeve mes dy kryeministrave do të jetë çelja e negociatave, situata pas tërmetit të 26 nëntorit si dhe çështje që kanë të bëjnë me OSBE, fushë të cilën Rama po e udhëheq së fundmi. Kujtojmë që, turi i vizitave të Ramës duket se do të jetë goxha i ngjeshur gjatë këtij viti, si kryeministër, por edhe kryesues i presidencës së OSBE.
Ndërkohë, ditën e djeshme kryeministri Edi Rama ishte në Zall-Herr në shtëpinë e rindërtuar dhe mobiluar nga e para të familjes së Riza Tafës, ku pas tërmetit të 21 shtatorit kjo familje mbeti në qiell të hapur nga tërmeti. I pari i qeverisë teksa i dorëzoi çelësin e shtëpisë vajzës së familjes, Xhensilës, tha se kjo mazhorancë qeverisëse i mban premtimet.
“Ne bëjmë çfarë themi dhe themi çfarë bëjmë. Ne duam që si kjo familje, të gjithë familjet që humbën banesën e tyre individuale nga tërmeti i madh, të hyjnë në shtëpi të re, më të mirë se ajo që kishin, brenda këtij viti në të gjitha zonat jashtë qytetit. Ne kemi plot që janë në çadër dhe presin shtëpinë. Duhet t’ua ndërtojmë patjetër, nuk mund t’i lëmë në çadër. Po bëjmë planet e ndërtimit e të gjithave, pasi duam ta bëjmë gjithçka më mirë, ashtu siç jeni ju këtu që është shumë mirë se ç’ishte shtëpia ekzistuese. Ne duam që grupin e atyre që kanë shtëpitë individuale ta mbyllim brenda këtij viti, të gjithëve t’u krijojmë mundësi që të kenë një shtëpi më të mirë se ajo që kishin brenda këtij viti”, deklaroi ai.
Duke folur për vizitën në pikën e konfliktit në Ukrainë në cilësinë e kryetarit të OSBE-së, kryeministri Rama ndau detaje nga ajo ç’ka përjetoi atje.
“Dje kur shkuam atje tek zona e konfliktit në Ukrainë thosha me vete që shpesh herë dhe kështu është se njeriu harron shumë dhe e harron të keqen shpejt, mirë bëmë që i bëjmë krahasimet me Gjermaninë dhe Francën. Por kur shikon sesi jetojnë njerëzit dhe kur mendon si kemi qenë jo shumë larg përpara”, nënvizoi Rama.
/a.r
