INSTAT: Shqiptarët po kursejnë energjinë, më pak shpërdorim se një vit më parë
Shqiptarët po harxhojnë gjithnjë e më pak energji, qysh kur është rritur çmimi dhe ka nisur aksioni i mbledhjes së debive. Këtë e tregojnë edhe shifrat e fundit të publikuara nga INSTAT, të cilat flasin qartë se aksioni i energjisë elektrike ka bërë që qytetarët të tregohen të kujdesshëm në konsumin e energjisë elektrike dhe të mos e shpërdorojnë atë.
Ulet konsumi energjisë
Sipas të dhënave zyrtare të Institutit të Statistikave gjatë pjesës së parë të këtij viti, ritmet e rritjes së konsumit të energjisë nga konsumatorët familjarë janë ngadalësuar. Në 6 mujorin e parë 2015, konsumi i energjisë nga familjarët u rrit me vetëm 2.3% nga 7.2% që ishte rritja në të njëjtën periudhë të një viti më parë dhe 13.5% që ishte në 6 mujorin e parë të 2013-ës. Duket se aksioni i qeverisë për energjinë i ka detyruar qytetarët që të mos e shpërdorojnë energjinë elektrike.
Aksioni i energjisë
Aksioni i qeverisë për energjinë nisi në tetor të vitit të kaluar. Ai synonte mbledhjen e detyrimeve të prapambetura dhe frenimin e shpërdorimit të energjisë elektrike, çka automatikisht do të çonte në ulje të konsumit. Shqipëria ka marrë angazhim përpara Bankës Botërore për ulje të konsumit të energjisë me 11% deri në vitin 2020. Aktualisht familjarët vijojnë të jenë konsumatorët kryesorë të energjisë elektrike në vendin tonë, sipas entit rregullator të Energjisë me 58% të totalit të konsumit.
