INSTAT: Në 3-mujorin e parë u ulën -1,8 çmimet e prodhimit

Në tremujorin e parë Janar-Mars çmimet e produkteve pësuan ulje, e cila si ndryshim vjetor llogaritet në -1,8, njoftoi sot INSTAT.
Sipas INSTA , ne  uljen më të madhe të IÇK-së në 3-mujorin e parë ndikuan çmimet e prodhimit në seksionin “Industri nxjerrëse” me 9,6 % dhe të prodhimit të produkteve vendase me 3,4% më pak.
Krahasuar me tremujorin e parë 2014, çmimet e prodhimit të produkteve për eksport në 3 muajt e parë sivjet, shënuan rritje me 0,8%.
Në tremujorin e parë 2015 ndryshimi tremujor i indeksit është -0,4 %, ku ndikim dhanë ulja e çmimeve të prodhimit në ”Industri Nxjerrëse” me 3,1 % krahasuar me tremujorin e katërt 2014. Por uljen më të lartë e shënuan çmimet e prodhimit në aktivitetin “Nxjerrja e naftës bruto dhe gazit natyror” me 5,7 %.
IÇK e prodhimit të produkteve të industrisë përpunuese u rrit me 0,6 %, brenda së cilës përmendet rritja e çmimeve të produkteve: “Prodhimi i mobiljeve” me 4,9 %,”Prodhimi i kimikateve dhe produkteve kimike” me 2,8 % dhe “Përpunimi i letrës dhe produkteve prej letre” me 2,5 %. Ndryshe prej këtyre lloj produktesh, u ulën çmimet e prodhimit të produkteve në aktivitetet: “Përpunimi i koksit, rafineria e nënprodukteve të naftës” me 2,4% dhe “Riparimi dhe instalimi i makinerive dhe pajisjeve” 3,1 %.
Indeksi i Çmimeve të Prodhimit për produktet vendase arriti 99,5 % duke shënuar ulje me 1,2 % krahasuar me tremujorin e katërt 2014. Më e lartë rezulton ulja e çmimeve të prodhimit të produkteve në seksionin ”Industri Nxjerrëse” me 6,8 %.
Por me rritje 0,6% rezultuan cmimet e prodhimit për produktet vendase “Industri përpunuese”.
Indeksi i Çmimeve të Eksportit arriti 104,6 %, duke shënuar rritjen 0,1 % krahasuar me tremujorin e fundit 2014, ku më e lartë ishte rritja e cmimeve të prodhimit të produkteve për eksport për industritë përpunuese me 0,5%.