Masat e marra nga Policia e Shtetit për respektimin e rregullave të qarkullimit në funksion të parandalimit të aksidenteve rrugore dhe rritjes së parametrave të sigurisë në rrugë, kanë çuar në uljen e numrit të aksidenteve rrugore. Sipas INSTAT, në muajin Qershor 2019 janë shënuar 131 aksidente rrugore nga 142 aksidente të ndodhura në Qershor 2018, duke shënuar kështu një ulje me 7,7 %, krahasuar me të njëjtën periudhë të një viti më parë. Ndërkohë, sipas po të njëjtin burim, për gjashtëmujorin e parë 2019, numërohen 714 aksidente rrugore nga 801 aksidente të ndodhura në gjashtëmujorin e parë 2018, duke u ulur me 10,9 %, krahasuar me të njëjtën periudhë të një viti më parë.
E njëjta situatë paraqitet dhe për sa i përket personave të përfshirë në aksidente rrugore. Në Qershor 2019, numri i të aksidentuarve (të vrarë dhe të plagosur) është 187 persona nga 217 që ishte një vit më parë, duke u ulur me 13,8 %. Po sipas INSTAT numri i të aksidentuarve në gjashtëmujorin e parë të vitit 2019, është 960 persona nga 1069 persona, duke u ulur me 10,2 %, krahasuar me të njëjtën periudhë të 2018.
Ditët e fundit Policia e Shtetit, Policia Rrugore ka
ndërmarrë një plan masash në të gjithë vendin për të përballuar me sukses sezonin turistik. Në të gjitha rrugët kombëtare, por sidomos ato akse që lidhin me bregdetin, Policia Rrugore është me shërbime të përforcuara dhe në monitorim për menaxhimin e trafikut. Shërbimet e Policisë Rrugore u kërkojnë gjithë drejtuesve të mjetit dhe i këshillojnë që të bëjnë kujdes me: Respektimin e normave të sjelljes; rregullave të qarkullimit rrugor; -Rregullimin e shpejtësisë dhe mbajtjen e distancës nga mjetet e tjera. Gjithashtu të bëhet kujdes me përdorimin e celularit dhe me parakalimet e gabuara.
