Informaliteti, Cani: Hiqet penaliteti për bizneset deri më 31 dhjetor, nuk ka rritje taksash
Ministri i Financave Shkëlqim Cani ka folur sot për ecurinë e operacionit antiinformalitet, duke u shprehur se deri më tani kur nuk është kontrolluar ende gjysma e bizneseve janë gjetur me shkelje 10% e bizneseve. “Bizneset janë lajmëruar më herët, por nuk e morën seriozisht”, tha ministri.
Duke u shprehur se do ndihmohet biznesi i vogël, Cani tha se parashikohet të hiqet penaliteti deri më 31 dhjetor. Ndërsa efektet e aksionit, sipas tij, pritet të shihen vitin tjetër. Kreu i Financave deklaroi ndër të tjera se nuk do të ketë rritje taksash.
Një tjetër tregues që përmendi Cani është se pajisjet fiskale janë shtuar në raportim, janë 16 mijë pajisje fiskale më shumë që raportojnë.
Të regjistruar gjatë 25 ditëve të muajit shtator janë mbi 60 mijë punonjës të rinj. “Kjo është një shifër që është shprehje e ecurisë së reformës”, vlerësoi ministri.
Krahas operacionit në terren, pjesë e planit të veprimit janë ndryshimet rregullative e ligjore. Sapo Kuvendi ka miratuar ndryshime në legjislacion, kryesisht për procedurat tatimore. Ministri përsëriti që të gjithë tatimpaguesit që kanë gjendje mallrash pa faturë, që e bëjnë deklaratën deri në 31 dhjetor 2015, u hiqet penaliteti dhe ndjekja penale, ndërsa duhet të paguajnë detyrimet. “Nga 1 janari do të jetë tjetër histori”, tha Cani.
Ndërsa duke folur për skanimin në dogana, ministri tha se tashmë vendosja e taksës është sanksionuar me ligj, edhe pse janë vërejtur disa probleme teknike. Sipas ministrit, skanimi me Rapiscan nuk rrezikon popullatën. “Nuk ka asnjë risk nga skanimi, kemi të gjitha dokumentet që s’ka asnjë dëm për popullatën”.
