Inflacioni i matur me Indeksin e Harmonizuar të Çmimeve të Konsumit (IHÇK) për muajin Gusht 2026 u regjistrua në normën 3,0%, duke pasqyruar ecurinë e çmimeve në tregun e brendshëm krahasuar me të njëjtën periudhë të vitit të kaluar.
Peshën kryesore në rritjen vjetore e mbajti grupi “Ushqime dhe pije joalkoolike”, i cili dha një kontribut prej +0,74 pikë përqindje (rritje vjetore 2,1%). Ai u ndoq nga grupi “Transporti” me një kontribut prej +0,59 pikë përqindje (rritje vjetore 7,0%), si dhe nga “Argëtim, sport dhe kulturë” me +0,55 pikë përqindje (rritje 8,5%) e “Restorante dhe shërbime akomodimi” me +0,51 pikë përqindje (rritje 3,5%).
Ulje prej 0,1% krahasuar me korrikun
Krahasuar me muajin paraardhës (Korrik 2026), çmimet e konsumit pësuan një ulje të lehtë prej 0,1%. Ndikimi kryesor erdhi nga grupet “Ushqime dhe pije joalkoolike” dhe “Veshje dhe këpucë”, secili me një rënie mujore prej 0,9%, të ndjekura nga “Pije alkoolike dhe duhan” (-0,4%) dhe “Mobilje, pajisje shtëpie dhe mirëmbajtje” (-0,2%).
Nga ana tjetër, rritja më e madhe mujore u shënua te “Transporti” me +2,1%, i ndjekur nga “Restorante dhe shërbime akomodimi” (+0,3%), si dhe “Qira, ujë, energji, gaz” e “Shëndeti” me nga +0,1%.
