Inflacioni në vendin tonë, i matur sipas Indeksit të Harmonizuar të Çmimeve të Konsumit, arriti në 3,4% në korrik të këtij viti, duke qëndruar 0,4% mbi mesataren prej 3% të Bashkimit Europian.
Të dhënat më të fundit të INSTAT tregojnë se rritja vjetore e çmimeve ndikohet kryesisht nga produktet ushqimore, por edhe shërbimet e lidhura me argëtimin, turizmin dhe akomodimin.
Grupi “Ushqime dhe pije joalkoolike” dha kontributin më të madh, me 1,09% në inflacionin vjetor, pasi çmimet u rritën me 3,2% krahasuar me korrikun e vitit të kaluar.
Referuar INSTAT, grupi i dytë “Argëtim, sport dhe kulturë”, ku çmimet u rritën me 8,5% në një vit, norma më e lartë ndër të gjitha kategoritë, pasi ky grup kontribuoi me 0,55% në inflacion.
Nga ana tjetër, çmimet në restorante dhe strukturat akomoduese u rritën me 3,6%, ose duke shtuar 0,53 pikë përqindjeje në normën vjetore. Së bashku, argëtimi dhe shërbimet e akomodimit dhanë një kontribut prej 1,08 pikësh përqindjeje, thuajse të barabartë me ndikimin e të gjithë grupit të ushqimeve.
Duke qenë se jemi në kulmin e sezonit turistik, ndikimi i shërbimeve turistike është më i dukshëm te Indeksi i Harmonizuar, pasi ky tregues përfshin edhe shpenzimet e turistëve të huaj në Shqipëri. Duke marrë shkas nga kjo, restorantet dhe akomodimi zënë rreth 14,5% të peshës së këtij indeksi, kundrejt vetëm 5,7% në Indeksin Kombëtar të Çmimeve të Konsumit.
