Muaji gusht ka sjellë rritjen e të infektuarve ditor me Covid-19. Sipas epidemiologëve shkak për këtë shtim të rasteve është varianti Delta i cili ka dhe transmetueshmëri 50% më të lartë. Epidemiologu Artan Simaku tha se moshat e reja përbëjnë pjesën më të madhe të të infektuarve.
Artan Simaku: Mbizotërojnë grupmoshat e reja nën 40 vjeç dhe grupmoshat 20-30 vjeç.
Gazetarja: Shkon në spital kjo grupmoshë?
Artan Simaku: Jo, fatmirësisht klinika e variantit Delta është më e lehtë dhe nuk ka nevojë për shtrim në spital. Kjo është për momentin sepse nuk mund të parashikohet si do të jetë ecuria në stinën e Vjeshtës dhe të Dimrit.
Mes të infektuarve me koronavirus në javët e fundit ka edhe persona që janë vaksinuar.
Artan Simaku: 5% e tyre preken me simptoma të lehta që nuk kanë nevojë për shtrim në spital dhe parandalohen rastet e rënda dhe ato fatale. Janë të vaksinuar kryesisht me një dozë, pra dy dozat japin mbrojtje maksimale ndaj variantit Delta.
Gazetarja: A ka ndonjë specifikim çfarë vaksine kishin bërë këta persona, ky 5%?
Artan Simaku: Nga të gjitha llojet e vaksinave, nuk ka dallim ndërmjet tyre.
Epidemiologu shprehet se Vjeshta pritet të sjellë edhe më shumë rritjen e rasteve, ndaj qytetarët të shfrytëzojnë muajin Gusht që të vaksinohen.
“Do ketë një valë tjeter në Vjeshtë, por në Shqipëri nuk do jetë si valët që kemi kaluar. Kjo dhe për shkak të ritmeve të vaksinimit ndaj duhet që të vaksinohen sa më shumë me te dyja dozat”.
Deri më tani janë vaksinuar mbi 720 mijë persona, prej të cilëve 562 mijë i kanë marrë të dyja dozat, ndërsa gati 160 mijë vetëm një dozë të vaksinës anti-covid./m.j
