Në raportin më të fundit të përpiluar nga “The Economist”, Shqipëria renditjet e 81-ta në rang global për treguesit e demokracisë. Raporti nënvizon se vendi ynë konsiderohet vend me regjim hibrid dhe se na ndajnë vetëm 2 vende nga të qenurit një vend me një demokraci të brishtë. Performanca jonë rajonale nuk është e mirë, duke qenë se renditet vetëm më mirë se sa Bosnja dhe Hercegovina, e cila ndodhet në vendin e 104.
Treguesit më të fortë i ka Serbia, e cila renditet në vend të 58-të, ndjekur nga Maqedonia në 78-të dhe Mali i Zi në 79-tën.
Në mesin e të gjithë ekonomive të analizuara, Norvegjia vlerësohet si vendi me nivelin më të lartë të demokracisë, ndërsa Korea e Veriut zë vendin e fundit, shkruan ‘Monitor’.
Shqipëria ka në total 5.91 pikë, duke pësuar kështu një regres kundrejt viteve 2008. Lajmi i mirë i vetëm i konstatuar në këtë raport është se, në krahasim me një vit më parë, vendi ynë ka fituar 7 vende në renditjen e përgjithshme. Sipas treguesve të analizuar për këtë raport, performancën më të dobët e jep pjesëmarrja politike me 3.89 pikë. Performancën me të mirë e japin të drejtat e njeriut dhe procesi zgjedhor.
Pavarësisht klasifikimit, raporti i revistës së njohur britanike vë theksin pikërisht të Shqipëria si një ndër vendet (ish-komuniste) që ka shënuar përmirësimet më të dukshme gjatë këtij viti, sidomos në luftën kundër krimit të organizuar dhe respektimit të të drejtave të njeriut.
