Gjatë një konference për shtyp në pallatin presidencial të Baabdas, emisarit amerikan Tom Barrack iu drejtua gazetarëve me tone të ashpra dhe paralajmëroi se nëse situata bëhej “kaotike dhe e egër”, ai do të largohej. Ai i kërkoi gazetarëve të “tregoheshin të civilizuar”, duke shkaktuar tension dhe reagime të ashpra në sallën e shtypit.
Pas incidentit, presidenca libaneze shprehu keqardhje për fjalët e Barrack dhe ritheksoi respektin për dinjitetin e gazetarëve dhe rolin e tyre profesional. Por sindikata e gazetarëve reagoi ashpër, duke e cilësuar sjelljen e emisarit si të papranueshme dhe duke kërkuar falje publike. Ajo paralajmëroi edhe bojkot të takimeve të mëtejshme me Barrack nëse ai nuk kërkon falje.
Reagime të forta pati edhe nga politikanë të ndryshëm, përfshirë deputetin e Hezbollahut Ibrahim Moussaoui, i cili e akuzoi Barrack për sjellje agresive dhe barbare, dhe kërkoi që autoritetet libaneze të thërrasin ambasadoren amerikane për të protestuar zyrtarisht. Gazetarë të njohur kritikuan ashpër qëndrimin e emisarit, duke e cilësuar atë si një fyerje të rëndë dhe si një shkelje të lirive dhe etikës profesionale.
Incidenti ndodhi në një periudhë të tensionuar politikisht, ku SHBA-ja kërkon çarmatimin e Hezbollahut në Liban, ndërsa ky i fundit refuzon bashkëpunimin. Vizita e Barrack lidhet me përpjekjet amerikane për të siguruar respektimin e armëpushimit dhe për të reduktuar praninë ushtarake izraelite në jugun e Libanit.
