Universitetet publike në mbarë vendin kanë shpallur listën e kandidatëve fitues të raundit të parë për pranimin në institucionet e arsimit të lartë.
Ky vit ka shënuar një numër më të lartë aplikantësh, nga 19.700 që ishte një vit më parë në 20.200.
Drejtori i Rrjetit Akademik Shqiptar, Arjan Xhelaj, flet për degët më të kërkuara, të cilat arrijnë t’i plotësojnë kuotat që prej fillimit.
“Inxhinieritë dhe IT-ja kanë mbi 30% të aplikimeve. Interesi në rritje në IT bën të mundur që edhe degët e tjera, që deri dje mund të quheshin të rrezikuara, si matematika, fizika ose degë të tjera, tashmë të preferohen, sepse nëse nuk arrin të kapësh IT-në të paktën mund të regjistrohesh në këto degë, të cilat krijojnë një bazë të fortë për të vijuar nesër-pasnesër në ciklin e dytë me një Master në fushën e Teknologjisë dhe Informacionit. Programet profesionale mbeten të kërkuara. Ato e kanë kaluar markën e 10-përqindëshit dhe besoj se gjatë ciklit të dytë do të kemi një rritje, duke pasur parasysh që kemi një numër të lartë maturantësh të cilët nuk e kapin mesataren 6,5. Është një grupim maturantësh që është i detyruar të studiojë këto degë profesionale,” shprehet z. Xhelaj.
Nënshkrimi i një kontrate për degët e Mjekësisë, për të punuar pas përfundimit të studimeve për jo më pak se tri vite në Shqipëri, nuk pati ndikim të ndjeshëm në numrin e aplikantëve në këtë universitet…
“Nëse ka 400 e ca kuota për Mjekësi, ato ezaurohen të gjitha. ‘Mot a mot’ të njëjtat shifra me vjet. Kanë lëvizur me 5 aplikantë, plus-minus, në aplikimet me A2,” shpjegon drejtori.
Këndi i maturantit në U-Albania i njeh ata me rezultatet e pranimit në universitet. E drejta për ankimim është vetëm dita 27 gusht. Studentët jofitues duhet të jenë të kujdesshëm dhe të verifikojnë lëvizjen e vijës së kuqe apo pragun e pranimit në fakultete pas regjistrimeve të para, që nisin më datë 29 gusht.
