Kryeministri i Maqedonisë së Veriut, Hristjan Mickoski në një konferencë të përbashkët me homologun e Kosovës Albin Kurti, ka komentuar edhe incidentin e ndodhur në aeroportin e Shkupit, ndaj presidentes, Vjosa Osmani.
Të dy kryeministrat shprehën keqardhjen e tyre për këtë ngjarje ndërsa kryeministri Mickoski, theksoi se herën tjetër do të dalë vetë ta presë miqësisht presidenten e Kosovës, Vjosa Osmani.
“Na vjen keq që ka ndodhur një gjë e tillë. Pres që herave tjera, Osmani të më njoftojë për udhëtimin e saj, edhe atë privat, që të dal në aeroport ta pres miqësisht” tha Mickoski.
Nga ana e tij, Kurti e konsideroi këtë rast si një përjetim dhe përvojë tejet të rëndë për presidenten e Kosovës, ndërsa theksoi se pret që ngjarja të hetohet dhe zbardhet në tërësi.
“Padyshim që ka qenë përjetim dhe përvojë e rëndë e presidentes së Kosovës me 2 gusht në aeroportin e Shkupit, aq më tepër që ka qenë me familje. Krerët shtetëror këtu kanë shprehur keqardhjen e tyre dhe do te ketë një raport zyrtar që do ta zbardhë rastin në tërësi”, theksoi Kurti.
/a.r
