Presidenti i SHBA-së, Donald Trump, dha detaje të reja rreth incidentit dramatik në fluturimin e Flydubai nga Dubai në Tel Aviv të mërkurën, duke thënë se kishte folur “gjërësisht” me kryeministrin izraelit Benjamin Netanyahu.
Trump tha se bashkëpiloti që dyshohet se e goditi me thikë kapitenin mund të ketë qenë “terrorist”, ndërsa përshkroi ndërhyrjen vendimtare të një pasagjeri izraelit, hidraulik me profesion, i cili ndihmoi në stabilizimin e avionit.
“Fola gjatë me Bibi Netanyahun rreth incidentit,” u tha Trump gazetarëve.
“Duket se bashkëpiloti ishte ndoshta një terrorist ose ndoshta me probleme dhe e goditi me thikë kapitenin”, tha presidenti.
Sipas asaj që përshkroi presidenti i SHBA-së, kapiteni u plagos rëndë, por arriti të hapte derën e kabinës dhe të thërriste ndihmë.
“Piloti ishte në gjendje shumë të keqe dhe, nga sa kuptoj unë, ai është ende në gjendje të keqe”, tha Trump, duke shtuar se pavarësisht lëndimit të tij, ai pati qetësinë për të hapur derën e kabinës.
Incidenti ndodhi në fluturimin FZ1073 të Flydubai, i cili po fluturonte nga Dubai në Tel Aviv dhe përfundimisht bëri një ulje emergjente në Tabuk, Arabi Saudite. Bashkëpiloti u arrestua dhe autoritetet po hetojnë motivet e tij, të cilat ende nuk janë sqaruar.
