Finalet europiane po afrojnë, këtë herë me një festë më të madhe se kurrë, falë numrit të rritur të skuadrave, në 24, midis tyre edhe Shqipëria.
Por finalet evropiane nuk kanë qenë përherë festë dhe brenda tyre ka pasur shpeshherë incidente, disa herë edhe të rënda, madje duke i kaluar kufijtë e futbollit. Ja disa prej tyre:
Boli godet me kokë
Stuart Pearce po diskutonte paqësisht me Jocelyn Angloma gjatë ndeshjes së Anglisë me Francën në Euro ’92, kur Basile Boli vjen nga hiçi dhe e godet me kokë mbrojtësin e Nottingham Forest. Pierce u mbulua me gjak, por nuk e mbylli incidentin. “Boli më dërgoi një faks në hotel ku më shkruante “faleminderit për sportivitetin”, pasi e dinte se sikur ta kisha bërë të madhe ai do të zhytej në m*t”, tha anglezi. “Unë eci me filozofinë që ato që ndodhin në fushë mbeten atje”.
Spanja kundër arbitrave
Vendi pritës gjithmonë përfiton pak nga arbitrat, por Anglia u ndihmua me të dyja duart në ndeshjen kundër Spanjës në Euro ’96. Julio Salinas shënoi një gol krejtësisht të rregullt që u anulua padrejtësisht, ndërsa Jose Luis Caminero u pengua në zonë në momentin kur bëhej gati të gjuante, pa asnjë ndëshkim. Spanja u eliminua me penallti. “Nuk luajtëm vetëm kundër 11 lojtarëve e 70 mijë tifozëve, por edhe kundër tre arbitrave. Ishte e pamundur të fitoje”, tha Salinas.
Franco kundër Bashkimit Sovjetik
Spanja doli në çerekfinale të Euro 1960, duke shkatërruar 7-2 Poloninë. Aty shorti e vuri përballë Bashkimit Sovjetik, por Gjenerali Franco refuzoi të lejonte sovjetikët në vendin e tij, duke u dhuruar kualifikimin në tavolinë. BS e fitoi më pas kompeticionin, ndërsa Spanja, me lojtarë të klasit të lartë si Ladislao Kubala, Alfredo Di Stefano, Luis Suarez e Francisco Gento me siguri që ka mbetur duke vrarë mendjen se çfarë mund të kishte ndodhur.
Lotët e portierit
“Papritur, filluan të më dilnin lotë nga sytë”, shpjegoi portieri i Anglisë, Ray Clemence. “Nuk mund të shihja, por e kuptova që kishte një problem pas portës”. Vërtet, ashtu ishte. Dhuna shpërtheu gjatë pjesës së parë të ndeshjes me Belgjikën, për Euro 1980, në Torino. Policia italiane hodhi gaz lotsjellës kundër tifozëve anglezë, të cilët nisën sherrin, si shpeshherë gjatë atyre viteve. Ndeshja u ndërpre për pesë minuta dhe përfundoi në barazim 1-1. Trajneri
Ron Greenwood shfryu: “Ne bëjmë gjithça siç duhet për të lënë mbresa të mira, pastaj këta bastardë prishin gjithçka”.
Tension racial te Holanda
Holanda ishte një nga favoritet në Euro ’96, por fushata e tyre u turbullua nga hamendësimet për ndarje racore brenda skuadrës. Hamendjet lindën pas një fotografie ku shfaqeshin lojtarët me ngjyrë të skuadrës që hanin në një tryezë veç të tjerëve. Por, Youri Mulder sqaroi më vonë se pakënaqësitë brenda skuadrës kishin të bënin me ndarjen e shpërblimeve dhe jo me ndarjen racore.
Humori tualeti nga Koeman
Holanda fitoi 2-1 kundër Gjermanisë Perëndimore në Hamburg, në gjysmëfinalen e Euro ’88. Holandezët festuan hakmarrjen për humbjen në finalen ’74, por Ronald Koeman e teproi. Pasi shkëmbeu fanellën me Olaf Thon, holandezi imitoi fshirjen e të pasmes me fanellën e Gjermanisë. Veprimi shkaktoi zemërim, madje edhe vetë i ati i lojtarit nuk e pëlqeu gjestin e të birit. Megjithatë, lojtari i PSV nuk bëri hap prapa. “A duhet të kërkojë ndjesë? Jo”, tha Koeman. Megjithatë, nuk u mor asnjë masë kundër tij dhe luajti në finalen e fituar 2-0 kundër Bashkimit Sovjetik.
Fiksimi nordik?
Italia e dinte që fitorja me Bullgarinë i siguronte kualifikimin në Euro 2004. Por, me kusht që Danimarka e Suedia të arrinin një rezultat të ndryshëm nga barazimi 2-2. Italia fitoi 2-1 me Bullgarinë, falë golit të Antonio Cassanos në minutën e fundit. Por vrapimi i tij i lumtur drejt stolit u ndesh me fytyrat e trishtuara. Çfarë kishte ndodhur? 2-2 në ndeshjen tjetër, me Suedinë që barazoi pak para mbarimit dhe u kualifikua bashkë me Danimarkën. “Dikujt duhet t’i vijë turp dhe nuk jemi ne ata”, tha Buffon.
Dora që ndihmoi Francën
Ndeshja midis Portugalisë e Francës po shkonte drejt penalltive, kur gjuajtja e Sylvain Wiltord goditi dorën e Abel Xavier. Gjyqtari austriak Benko fillimisht njoftoi për goditje nga këndi, por pas sinjalizimit të asistentit dha penallti. Zidane shënoi golin që çoi Francën në finale.
Goal/d.i.
