Mbrëmjen e djeshme (25 maj) u zhvillua finalja e parë e turneut më të ri të UEFA-s, Conference League në stadiumin “Air Albania” në Tiranë midis Romës dhe Feynoord.
Skuadra italiane e Romës ia doli të mposhtë skuadrën holandeze të Feyenoord me rezultatin 1-0.
Por si u menaxhuan tifozët e zellshëm të dy ekipeve, të cilët të martën e 24 majit shkaktuan trazira në kryeqytet, duke u përplasur me policinë.
Në lidhje me këtë pedagogu i kriminalistikës, Ervin Karamuço i ftuar në studion e Abc Live pohoi se situata e tifozëve të huaj u menaxhua mirë nga policia shqiptare. Karamuço tha se vendi ynë kaloi me sukses sfidën me tifozët e rrezikshëm.
Ai tha se një natë para ndeshjes policia selektoi personat problematikë, duke i larguar nga vendi.
“Nga të dyja palët pati incidente të rënda. Shija në fund ishte pozitive, sidomos në natën finale. Arritëm që të kalonim me sukses sfidën. U menaxhua në mënyrë të suksesshme. Në Rotterdam ka pasur gati 80 arrestime nga tifozët e Feynoord. Incidentet priteshin por u tejkaluan.
Janë selektuar personat më problematikë dhe janë depërtuar.
Në një farë mënyrë u reduktuan tendenca e tyre për të pasur përplasje gjatë natës së dytë. Për fat të mirë nuk pati plagosje të rënda përveç një efektivi që u qëllua me thikë. Ka pasur informacione që thikat , shishet e qelqit mos bien në dispozicion të turistëve,” tha Karamuço.
g.kosovari
