Mesazhe të shkurtra, të koduara dhe shpesh tronditëse. Sistemi ACARS tregon anën e padukshme të fluturimeve ajrore: incidente, emergjenca dhe ndërhyrje policie në qiell.
Një pasagjere që kërkon alkool dhe detyron avionin të devijojë. Tualete jashtë funksionit, telefona të ngecur në sedilje, pasagjerë të padisiplinuar dhe arrestime që kryhen sapo avioni prek pistën. Këto nuk janë skena filmi, por pjesë e përditshmërisë së fluturimeve ajrore, të dokumentuara përmes mesazheve ACARS.
Më 21 janar, në një fluturim nga Toronto drejt Cayo Coco (Kubë), ekuipazhi njofton qendrën operative se një pasagjere në vendin 8D po bëhet e pakontrollueshme.
«Kërkon alkool dhe thotë se do të ketë një krizë nëse nuk ia japim», thuhet në mesazh. Avioni detyrohet të devijojë drejt SHBA-së për ta zbritur pasagjeren.
Një ditë më pas, në një Boeing 777 nga Londra për në Singapor, raportohen probleme të pazakonta: makinat e kafesë nuk funksionojnë, ndërsa sirtari i një sediljeje është i bllokuar, me tabletin e pasagjerit brenda.
Më 26 janar, në një avion të nisur nga Frankfurti, pilotët marrin një njoftim delikat: dy pasagjerë po kthehen me forcë në Kolumbi, pasi janë refuzuar nga autoritetet gjermane.
“Duhet t’u dorëzohen autoriteteve lokale në Bogota”, shfaqet në ekranet e kabinës.
ACARS (Aircraft Communications Addressing and Reporting System) është sistemi i komunikimit automatik mes avionëve dhe qendrave tokësore, përmes radios ose satelitit. Ai përdoret për gjithçka: nga koordinimi i fluturimeve dhe problemet teknike, te emergjencat mjekësore dhe njoftimet për sigurinë.
Mes mbi 30 mijë mesazheve ACARS të analizuara gjatë një muaji, shumë lidhen me ndërhyrjen e policisë.
Në fluturimin Cyrih–Hong Kong, një pasagjer denoncon vjedhje. Qendra tokësore udhëzon ekuipazhin që të mbajë të gjithë pasagjerët në vendet e tyre, pasi policia do t’i kontrollojë në mbërritje.
Në raste të tjera raportohen pasagjerë të padisiplinuar, pirje duhani në tualet apo sjellje agresive që rrezikojnë sigurinë e fluturimit.
Në disa fluturime, arrestimet organizohen në fshehtësi për të shmangur panikun.
Në linjën Delhi–Londër, ekuipazhi udhëzohet të mos e informojë pasagjerin që do të arrestohet dhe të sigurojë që të gjithë të tjerët të qëndrojnë ulur pas uljes.
Një tjetër operacion ndodh në fluturimin Bangkok–Londër, ku policia arreston dy persona sapo avioni mbërrin, pa u njoftuar më parë pasagjerët e tjerë.
Mesazhet ACARS dokumentojnë edhe raste urgjente shëndetësore, përfshirë një stjuardesë që shfaq simptoma shqetësuese gjatë fluturimit Seattle–Incheon, si dhe incidente më të zakonshme, si pasagjerë që sëmuren në bord.
Në një fluturim nga Xhakarta në Abu Dhabi raportohet edhe një rast i dyshuar agresioni seksual. Kompania ajrore aktivizon procedurat e sigurisë, por më pas pasagjerja vendos të mos paraqesë ankesë zyrtare.
Me rreth 14 milionë njerëz që fluturojnë çdo ditë në mbarë botën, avionët janë një “metropol në qiell”. Dhe kur diçka shkon keq, mesazhet ACARS bëhen linja e parë e raportimit të incidenteve, duke zbuluar një realitet që pasagjerët rrallë e shohin.
