Në prag të zgjedhjeve vendore, ka ardhur edhe incidenti i parë elektoral, këtë radhë nën përdorimin e armëve. Sipas të dhënave të para, një konflikt mes disa personave në Paskuqan, ka bërë që njëri prej tyre të nxjerrë armën dhe të qëllojë në tokë.
Sipas policisë, bëhet fjalë për personin me iniciale L.L i cili qëlloi me armë në tokë, dhe më pas është larguar me makinë, duke u shpallur në kërkim nga uniformat blu.
Ndërsa nga ana e saj, Partia Demokratike shprehet se personi që qëlloi me armë është një militant i majtë. Lidhur me këtë ngjarje ka reaguar edhe kandidati i djathtë për Bashkinë e Paskuqanit, Xhelal Mziu. Në një deklaratë për mediat, Mziu tha se incidenti është bërë më qëllim pengimin e takimit që ai do zhvillonte në këtë zonë.
“Incidenti me armë ndodhi në rrugën “Avni Nela”. Liman Lita na pengoi të zhvillojmë takimin. Personi qëlloi me armë, por e shmangën qytetarët. Votat nuk merren me armë dhe miell, ne jemi fitues”, tha Mziu.
Megjithatë ende janë të paqarta motivet, teksa policia ka mbërritur në vendin e ngjarjes dhe ka nisur punën për zbardhjen e rrethanave të incidentit.
