Nga Ilva Tare
Për studentët e auditoreve ku mësohet komunikimi politik nuk është lajm i ri fakti se mënyra e si politikanët komunikojnë me publikun e tyre është rrënjësisht e transformuar dhe njëkohësisht e pasuruar me mesazhet e përcjella përmes rrjeteve sociale. Ndërsa për gazetarët profesionistë apo edhe strategët e komunikimit politik është e qartë se mënyra inovative e shpërndarjes së mesazhit në rrjete sociale është sa e përparuar aq edhe e cunguar.
Bota e ashtëquajtur e online-it i ka bërë teorinë e komunikimit në politikë më pluraliste, më të shpejtë e të drejtpërdrejtë, aq sa e lejojnë dhe 140 gërmat e Twitter-it apo statuset në Facebook. Por vetëm kaq. Argumentimi, shpjegimi, thellimi në argumenta është i pamundur të realizohet në pak gërma që shpesh janë thënie dhe batuta që synojnë të ngacmojnë ndjekësit se sa ti sqarojnë realisht ata. Ndaj komunikimi online konsiderohet si një paralajmërues i një qëndrimi formal që politikani në fjalë do të marrë mundimin të bëjë në orët e ardhshme.
Por, në vendin tonë i bien edhe më shkurt se kaq. Mjafton statusi në një nga rrjetet sociale dhe gazetarët kujdesen vetë për ta përcjellë brenda ditës apo edhe të nesërmen nëpër gazeta, si dëshmi e thatësirës së lajmeve në stinën e nxehtë të verës por edhe si provë e degradimit të nivelit profesional të një zanati që kërkon verifikim, komunikim të drejtpërdrejtë me burimin, ballafaqim me faktet reale për qëndrimin që mban burimi dhe më së paku përzgjedhje të qëndrimit se cfarë përbën lajm dhe cfarë duhet lënë në memorien e ndjekësve virtualë.
Fakti që politikanët mund të arrijnë të komunikojnë në mënyrë virtuale me një numër të madh ndjekësish përmes një reagimi online ua ka lehtësuar domosdoshmërinë për prani në median tradicionale dhe atë të dixhitale online. Shumica e politikëbërësve në Facebook e kanë fituar luksin t’i injorojnë gazetarët e televizioneve dhe mediave të shkruara, sepse ata gjithsesi e pushtojnë hapësirën e komunikimin edhe me statuset “gallatë” në rrjetet sociale.
Gjatë këtij sezoni veror ku pavarësisht zgjedhjeve dhe rezultatit të tyre, është bërë politikë në Facebook nga fituesit, humbësit, nga opozitarë zyrtarë dhe opozitë nga frëngjitë e ministrive që kanë ende në drejtim.
Pavarësisht se në cilin breg të detit (apo oqean) vilë apo apartament ku ndodheshin dhe cfarë zhvillimesh ose mos zhvillimesh kishte në Shqipëri, në media nuk munguan qëndrime personale dhe partiake të individëve që me lehtësinë më të madhe të komunikimit përmes një statusi në rrjete sociale mbushën edicionet e lajmeve.
Përgjegjësia është e gazetarëve që subjekte të tipit gastorë të biznesit të Zuckenberg, i kthyen në personazhe që shprehnin qëndrime politike nga zyrat e tyre të punës, apo a thua se kishin marrë mundimin të ndërtonin një linjë të qartë politike, për të cilin publiku shqiptar mund të kishte vërtet nevojë të mësonte. Po në fund të fundit, publiku është i fundit për të cilin po kujdeset media në ditët e sotme./JavaNews.al
