ILVA TARE/ Fjalët mbaruan, numërimi mbrapsht ka filluar!

Numërimi mbrapsht për miratimin e reformës në drejtësi ka nisur. Muaji Maj është afati i fundit që ligjvënësit të japin votën për një nga reformat më të rëndësishme në vend, që nga rënia e diktaturës. Votimi në Kuvend i paketës Kushtetuese në ditët e ardhshme, edhe pse në kufijtë e fundit të mundësive, ka gjasa t’i sigurojë Shqipërisë rekomandimin në vjeshtë për hapjen e negociatave me BE.

Tirana zyrtare u vizitua vitin e fundit nga personalitete të rëndësishme në nivel botëror, si Merkel, Kerry dhe zyrtarët e Bruskelit Shulz, Tusk e Mogherini, të cilët në axhendën e tyre kanë patur të nënvizuar me të kuqe reformën në drejtësi dhe rëndësine që ka për partnerët shteti ligjor funksional dhe i barabartë për të gjithë.

Të gjithë skenarët e përfolur ose të fantazuar nga ata politikanë, të cilëve ju është kërkuar angazhimi pro reformës në drejtësi se me amerikanët dhe europianët mund të luhet loja e gjoja vullnetit dhe stërkëmbëshave pas shpine, kanë mbërritur tashmë në pikën e vdekjes. Sikundër u shpreh sot Romana Vlahutin Bashkimi Europian, nuk do të heqë dorë, nuk do të mërzitet nga zvarritjet, por reforma do të bëhet nga aktorët shqiptarë.

Me të njëjtën vendosmëri janë shfaqur orët e fundit në takimet e tyre edhe zyrtarët amerikanë, krejtësisht të investuar për një shkundje të fortë të sistemit aktual të drejtësisë, në të kundërt, Washingtoni duket i përgatitur për të nxjerrë në fushë-betejë “armët e rënda” kundër atyre individëve që do të pengojnë përfundimin e një procesi të monitoruar nga Shtëpia e Bardhë.

Nuk është e qartë se çfarë janë të ashtëquajtura “armët e rënda” që po dëgjohen nga disa burime pranë negociatave për drejtësinë, por nëse kihet parasysh eksperienca e vendeve të tjera që i janë bashkuar familjes europiane duke mbartur virusin e korrupsionit të klasës politike që nga koha e komunizmit, mendohet se publikimi i emrave që shpallen persona non grata, mund të jetë hapi i parë i fillimit të fundit të politikanëve shqiptarë.

Orët e ardhshme janë dhe orët e fundit të një përpjekjeje të hekurt të ndërkombëtarëve për ta përfunduar reformën në një prej sistemeve të konsideruara nga qytetarët shqiptarë si më i korruptuari. Muajt që vijnë mund të rezervojnë surpriza të pakëndshme dhe apo tragjedi në pritje siç shkruante The Economist për amerikanët dhe për mbarë botën.

Është e vështirë të mos merret në konsideratë një zgjedhje e mundshme e populistit të rrezikshëm Donald Trump në Shtëpinë e Bardhë, gjë që do të pasohej me një fshirje të Ballkanit nga lista e interesave të amerikanëve, apo edhe daljen e SHBA nga NATO. Atëherë, shqiptarët do të mbeteshin të vetmuar në dëshirën e tyre për drejtësi dhe shtet ligjor dhe politikanët vendas nuk do të ndodheshin nën presionin e partnerëve për t’i dhënë fund epokës së pandëshkueshmërisë.