Ish-deputeti socialist, Ilir Zela, ka reaguar lidhur me propozimin e 10 deputetëve për të ndryshuar mënyrën e zgjedhjes së Presidentit të Republikës, duke e kaluar atë me votim popullor dhe jo nga Kuvendi. Nëpërmjet një postimi në rrjetet sociale, Zela shprehet se zgjedhja nga populli e Kreut të Shtetit nuk ka vlerë, nëse ai nuk ka kompetenca.
“Presidenti nga populli? Padyshim po! Por kjo nuk ka asnjë vlerë nëse presidentit i mbeten vetëm çelësat e kashtës. Duhet që deputetët të zgjidhen nga populli me lista të hapura. Duhet që qeveritë të ndjehen llogaridhënëse para Kuvendit. Duhet që drejtësia të jetë e ndershme dhe e pavarur që të dënojë hajninë dhe krimin!”, shkruan ish-ministri Zela.
Sipas tij, “duhet rilindur konkurrenca në ekonomi, në politikë e në çdo fushë, ku monopolet shkërmoqin konkurrencën”. “A është pjekur demos-i shqiptar sa t’i kërkojë dhe t’i meritojë këto bekime të provuara të demokracisë?”, pyet Zela në postimin e tij.
