Ilir Meta thotë se vendi ndodhet në krizë të thellë institucionale në të gjithë sektorët. Në një postim në Facebook, kreu i shtetit ka reaguar për ngërçin më të fundit, atë të bojkotimit të kampionatit të futbollit.
Sipas tij, qeveria duhet të gjejë një zgjidhje përmes dialogut me Ligën Profesioniste të Futbollit në mënyrë që të rinisë kampionati i futbollit. Ky aktivitet është ndërprerë për një kohë të pacaktuar, deri në përmbushjen e kërkesave të tyre nga ana qeverisë.
“Kriza e thellë kushtetuese, institucionale dhe përfaqësuese po përshkallëzohet në përmasa shqetësuese në të gjithë sektorët. Futbolli shqiptar, krenaria jonë kombëtare, prej javësh ndodhet në një ngërç, për shkak të vendimit për shtyrjen e datës së fillimit të kampionatit të Kategorisë Superiore, sezoni 2020 / 2021, që duket se do të vazhdojë për një kohë të pacaktuar në mungesë të vullnetit për gjetjen e një zgjidhjeje të mënjëhershme.
I njohur me kërkesat e drejta të Ligës Profesioniste të Futbollit, i bëj thirrje qeverisë që përmes dialogut, bashkëpunimit dhe mirëkuptimit të angazhohet për t’i rikthyer frymëmarrjen futbollit shqiptar, që ka kohë që ndodhet në vështirësi dhe sot kërkon vëmendje e mbështetje nëpërmjet një baze të sigurt ligjore”, shkruan Presidenti Ilir Meta.
