Ish-Presidenti Ilir Meta, i cili ndodhet pas hekurave që prej tetorit të vitit të kaluar, këtë të hënë feston ditëlindjen e 56-të.
Kreu i Partisë së Lirisë është uruar përmes një postimi në Facebook nga ish-ministri i Transporteve dhe bashkëpunëtori i tij që nga koha e LSI, Edmond Haxhinasto.
“Gëzuar Ditëlindjen Ilir Metaj, dhe sa më shpejt në liri, lider i guximshëm e patriot, i paepur e vizionar, bashkëluftëtar i hershëm për ta bërë Shqipërinë Evropiane dhe shqiptarët të mirëqenë”, shkruan Haxhinasto përbri një fotoje të vjetër të të dyve.
Meta u arrestua më 21 tetor 2024, me urdhër të Prokurorisë së Posaçme nën dyshimet për “korrupsion, pastrim parash, mosdeklarim dhe fshehje të pasurisë”.
SPAK thekson se Meta dhe bashkëshortja e tij “në bashkëpunim mes tyre, por edhe me funksionarë të tjerë publikë, janë përfshirë në kryerjen e disa veprave penale”.
Hetimet ndaj Metës nisën në vitin 2019 në lidhje me aferën e njohur si ÇEZ-DIA, që lidhet me privatizimin e ndërmarrjes së shpërndarjes së energjisë dhe mbledhjen e borxheve të mbetura.
Tre vjet më vonë u hap një tjetër rast, pas një kallëzimi për pagesa në vlerë të mijëra eurove të padeklaruara nga partia e drejtuar nga Meta, për lobim në Shtetet e Bashkuara. Dy dosjet, më pas, u shkrinë në një të vetme më 2024.
Prokuroria e Posaçme thotë se Meta në cilësinë e ministrit të Ekonomisë, Tregtisë dhe Energjetikës, “ka përdorur autoritetin dhe influencën e tij për të ndërhyrë në procesin e përzgjedhjes së kompanisë DIA për të mbledhur borxhet e ÇEZ, edhe pse ajo nuk i përmbushte kriteret ligjore e profesionale”.
Në dosje po ashtu thuhet se Meta si kryetar Kuvendi, dhe bashkëshortja e tij si deputete, në vitin 2014 kanë përdorur ndikimin e tyre për të futur në tregun e fibrave optike një kompani dhe kanë përfituar më pas përqindje nga fitimet e kompanisë.
