Mjeku i njohur Ilir Alimehmeti, i ftuar në emisionin Medicus në News24, ka paralajmëruar për rreziqet shëndetësore që sjell sezoni i verës, duke theksuar se higjiena dhe kujdesi ndaj ushqimeve janë thelbësore për të shmangur infeksionet dhe helmimet.
I pyetur nga moderatorja Daljana Sejdia për helmimet ushqimore, Alimehmeti tha se pasojat varen nga lloji i bakterit dhe sasia e konsumuar.
“Në disa raste, dozat e mëdha mund të çojnë në dëmtime serioze të mukozës së zorrëve,” u shpreh ai, duke shtuar se higjiena është thelbësore, sidomos në lokalet ku shërbehet ushqim. Ai përmendi se kontrollet kanë zbuluar akullore të kontaminuara në treg.
Sa i përket pishinave, mjeku theksoi se ato nuk janë kurrë të barasvlershme me ujin e detit. Klori i përdorur për dezinfektim duhet të jetë në përqindjen e duhur, pasi sasia e tepruar mund të jetë gjithashtu e dëmshme.
Duke folur për sëmundjet infektive që qarkullojnë gjatë verës, Alimehmeti përmendi fruthin dhe malarien si shembuj të rrezikut që sjell lëvizshmëria e lartë e popullsisë në këtë periudhë. Ai konfirmoi gjithashtu se në Shqipëri janë raportuar raste me hepatit A, duke theksuar se “higjiena personale dhe ushqimore është vendimtare në parandalimin e kësaj sëmundjeje.”
Në fund, Alimehmeti u bëri thirrje qytetarëve që të tregohen të kujdesshëm në zgjedhjen e vendeve ku konsumojnë ushqim dhe të respektojnë standardet bazë të pastërtisë për të shmangur rreziqet e verës.
