Inspektori i Lartë i Drejtësisë (ILD) ka vendosur të mos nisë një hetim disiplinor ndaj prokurores së Shkodrës, Elsa Gjeli, e cila ishte akuzuar nga qeveria për mosveprim ndaj një ndërtimi pa leje në zonën e Thethit.
Në një letër drejtuar Ministrit të Drejtësisë Ulsi Manja, ILD bën me dije se pas verifikimeve paraprake të ankesës së dorëzuar më 10 korrik 2025, nuk janë konstatuar elementë juridikë apo faktikë që të ngrejnë dyshime të arsyeshme për nisjen e hetimit disiplinor ndaj magjistrates Gjeli.
“…është vendosur arkivimi pas verifikimit të ankesës tuaj“, thuhet në vendimin e ILD-së, i mbështetur në nenin 122 të ligjit për statusin e gjyqtarëve dhe prokurorëve.
ILD i njeh ministrit të Drejtësisë të drejtën për të ankimuar këtë vendim brenda një jave në Këshillin e Lartë të Prokurorisë.
Elsa Gjeli është prokurorja e cila u kritikua ashpër nga kryeministri Edi Rama në fillim të muajit korrik, pasi ajo kishte vendosur të mos fillonte hetimet lidhur me një çështje të ndërtimit pa leje në zonën e Thethit, që u bë shkak dhe për nisjen e një operacioni për prishjen e ndërtimeve pa leje në këtë zonë. Temë që shkaktoi shumë debate dhe u pasqyrua në media.
Ulsi Manja i cili ishte ministri i Drejtësisë, pati kërkuar nisjen e një hetimi ndaj prokurores Gjeli me argumentin se ajo jo vetëm ishte nxituar, por kishte shkelur ligjin kur arriti në vendimin të mos e hetonte rastin.
